پاکستان تے چین دے عوام گھاٹے تے تکڑے رشتے اچ ڳنڈھئے ہوئن ، صدرِ مملکت آصف علی زرداری

چانگشا ۔ 26 اپریل (اے پی پی) صدرِ مملکت آصف علی زرداری آکھیے جو پاکستان تے چین دے عوام گھاٹے تے تکڑے رشتے اچ ڳھنڈے ہوئن تے انھاں کوں یقین اے جو ݙوہیں ملکاں دے عوام دے دل ہمیشہ ہک ٻئے دے نیڑے رہسن ، ہونان صوبے دے نال مختلف شعبیں اچ تعاون دے ٻہوں وݙے امکانات موجود ہن۔ اے ڳالھ انہاں چین دے صوبہ ہونان دے پارٹی سیکرٹری شین شیائومنگ نال ملاقات اچ آکھی ۔ایوانِ صدر دے پریس ونگ توں جاری بیان موجب ملاقات اچ زراعت، صحت، تعلیم تے تجارت دے شعبیں اچ عملی تعاون ودھاوݨ تے توجہ رکھی ڳئی اے، جݙاں جو پاکستان تے چین دے تکڑے تے پراݨے تعلقات دی اہمیت دا اعادہ کیتا ڳئے۔ ملاقات اچ صدرِ مملکت شین شیائومنگ کوں پاکستان تے چین وچال سفارتی تعلقات دے 75 سال پورے تھیوݨ دی تقریباں دے سلسلے اچ پاکستان دے دورے دی دعوت ݙتی اے۔ انھاں ایں ڳالھ تے زور ݙتے جو پاک-چین تعلقات پاکستان دی خارجہ پالیسی دا بنیادی ستون ہن تے انھاں کوں وݙی عوامی حمایت حاصل اے۔صدرِ مملکت چین دے نال اپݨے پراݨے ذاتی تعلق دا وی ذکر کیتے تے آکھیے جو انھاں دا خاندان، جیندے اچ انھاں دے مرحوم سورھے شہید ذوالفقار علی بھٹو تے مرحومہ اہلیہ شہید بینظیر بھٹو شامل ہن، ہمیشہ چین دے نال تعلقات کوں خاص اہمیت ݙیندے رہین۔ انھاں آکھیے جو اے روایت ہݨ اڳلی نسل، جیند اچ انھاں دا پُتر بلاول بھٹو زرداری تے خاتونِ اول آصفہ بھٹو زرداری شامل ہن، دے ذریعے اڳوں ودھائی ویندی پئی اے۔ انھاں ہونان دی زرعی ٹیکنالوجی تے آلات اچ مہارت دی تعریف کریندے آکھیے پاکستان اچ زرعی پیداوار ودھاوݨ دی کوشِشاں کیتے ٻہوں اہم اے۔ انھاں بِجاں دی ٹیکنالوجی تے جدید کاشتکاری دے طریقیں اچ نیڑے تعاون دی خواہش دا اظہار کیتے۔ملاقات اچ علاقائی صورتحال تے وی ڳالھ مہاڑ کیتی ڳئی اے۔ صدرِ مملکت کوں ݙسایا ڳئے جو ہونان دی یونیورسٹیاں پاکستانی اداریں نال 12 تعاون دے معاہدے کیتن، جݙاں جو ایں ویلھے959 پاکستانی طلبہ مختلف شعبیں اچ ہونان اچ پڑھدے پئن۔صدرِ مملکت ہونان دے گورنر ماؤ ویمنگ دی طرفوں اپݨے اعزاز اچ ݙتے ڳئے عشائیے اچ شرکت کیتی اے تے ایں موقع تے خطاب کریندے آکھیے جو گورنر ہونان ماؤ ویمنگ پاکستان تے چین کوں چنڳے دوست، چنڳے ہمسائے تے چنڳے بھرا قرار ݙتے ۔ انھاں آکھیے جو ہونان صوبہ چین پاکستان اقتصادی راہداری دی ترقی اچ خلوصِ نیت نال اپݨا کردار جاری رکھیسی ۔ انھاں آکھیے جو ہونان کوں ماؤ زے تنگ دی جاہِ پیدائش ہووݨ پاروں خاص اہمیت حاصل اے۔ انھاں عوامی طاقت دے تصور دا ذکر کریندے آکھیے جو اے پاکستانی عوام اچ وی ٻہوں مقبول اے۔عشائیہ توں خطاب کریندے پاکستان اچ چین دے سفیر جیانگ زی ڈونگ آکھیے جو صدرِ مملکت آصف علی زرداری دا ہونان دا دورہ چیئرمین ماؤ نال انھاں دی خاص عقیدت دا ثبوت اے۔ انھاں امید ظاہر کیتی اے جو اے دورہ ݙوہیں ملکاں کوں مزید نیڑے گھن آسی۔ سینیٹر سلیم مانڈوی والا، صوبائی وزیر شرجیل انعام میمن، علی حسن بروہی، سید قاسم نوید قمر، چیف سیکرٹری سندھ تے سفیر خلیل ہاشمی وی صدرِ مملکت دے رلے ہن۔