پاکستان اتے چین وچال سمندری پاݨی کوں قابلِ استعمال ٻݨاوݨ، زرعی ٹیکنالوجی تے چاہ دے شعبے اچ تعاون دی مفاہمتی یادداشتاں تے دستخط، صدر آصف علی زرداری تقریب اچ خصوصی طور تے شرکت کیتی

چانگشا۔27 اپریل (اے پی پی) پاکستان اتے چین وچال سمندری پاݨی کوں قابلِ استعمال ٻݨاوݨ، زرعی ٹیکنالوجی اتے چاہ دے شعبے اچ تعاون دی ترائے مفاہمتی یادداشتاں تے دستخط کیتے ڳئے جیندے اچ صدرِ مملکت آصف علی زرداری خصوصی طور تے شرکت کیتی۔ سنوار کوں ایوانِ صدر دے پریس ونگ توں جاری بیان دے مطابق چین دے صوبے ہونان دے شہر چانگشا اچ ایم او یوز تے دستخطاں دی تقریب تھئی۔ صدر آصف علی زرداری خصوصی طور تے تقریب اچ شرکت کیتی جیندے اچ سمندری پاݨی کوں قابلِ استعمال ٻݨاوݨ، زرعی ٹیکنالوجی اتے چاہ دے شعبے اچ تعاون دے سمجھوتیاں تے دستخط کیتے ڳئے۔ مفاہمتی یادداشتاں اہم شعبیاں اچ عملی تعاون دے فروغ دی مربوط کوشش دی عکاسی کریندن۔پہلی مفاہمتی یادداشت محکمہ بلدیات سندھ اتے اوشیئن انوائرمنٹل ٹیکنالوجی گروپ وچال طے پائی۔ کراچی شہر کوں پاݨی دی فراہمی اچ اضافے کیتے سمندری پاݨی کوں مٹھا ٻݨاوݨ دے منصوبے تے تعاون کیتا ویسی۔ سندھ دے سینئر وزیر شرجیل انعام میمن تے لوشیئن انوائرمنٹل ٹیکنالوجی گروپ دی پارٹی برانچ دے سیکرٹری اتے چیئرمین یوہوئی دستخط کیتے۔ ݙوجھا سمجھوتہ محکمہ بلدیات سندھ تے لانگ پن ہائی ٹیک انفارمیشن کمپنی دے درمیان زرعی ٹیکنالوجی اچ تعاون کیتے طے تھیا۔ سمجھوتے تے سندھ دے سینئر وزیر شرجیل انعام میمن اتے چینی کمپنی ولوں چیئرمین چن ژی شین دستخط کیتے۔ تریجھی مفاہمتی یادداشت چاہ دے شعبے متعلق اے جیڑھی مسکے اینڈ فیمٹی ٹریڈنگ کمپنی، ہونان ٹی گروپ تے جیالونگ انٹرنیشنل ٹیکنالوجی (ہینان) وچال طے تھئی۔ پاکستان ولوں سینیٹر سلیم مانڈوی والا ایم او یو تے دستخط کیتے۔ ہونان ٹی گروپ دے پارٹی سیکرٹری و چیئرمین ژو چونگ وانگ تے ہینان جیالونگ انٹرنیشنل ٹریڈ ٹیکنالوجی دے چیئرمین ہائو جیاولونگ دستخط کیتے۔ سمجھوتے دا مقصد صنعت دے سارے شعبیاں اچ تعاون کوں فروغ ڈیوݨ اے، چاہ دی صنعت دی ترقی اچ معاونت تے اقتصادی، تجارتی تے عوامی رابطیاں کوں وی تگڑا ٻݨایا ویسی۔ وزیرِ اعلیٰ سندھ دے معاون خصوصی سرمایہ کاری تے پبلک پرائیویٹ پارٹنر شپ منصوبہ جات قاسم نوید قمر، چیف سیکرٹری سندھ علی حسن بروہی تے چین اچ پاکستان دے سفیر خلیل ہاشمی وی موجود ہن۔