پاکستان جنوبی افریقہ دے نال آپݨے دوستانہ تعلقات کوں بہوں اہمیت ݙیندے، صدر آصف علی زرداری دی جنوبی افریقہ دی قیادت کوں قومی ڈیہوار تے مبارکباد

اسلام آباد۔27 اپریل (اے پی پی) صدرِ مملکت آصف علی زرداری جنوبی افریقہ دی قیادت کوں قومی ݙیہوار تے مبارکباد ݙیندیں ہوئیں آکھیا جو پاکستان جنوبی افریقہ دے نال آپݨے دوستانہ تعلقات کوں بہوں اہمیت ݙیندے۔ انہاں ایں عزم دا اعادہ کیتا جو فوہائیں ملکاں وچال اڄوکے تعلقات مستقبل اچ بئے تگڑے تھیسن۔ سنوار کوں ایوانِ صدر دے پریس ونگ توں جاری سنیھے اچ صدرِ مملکت آصف علی زرداری جنوبی افریقہ دے صدر ماتامیلا سیرل رامافوسا تے جنوبی افریقہ دی عوام کوں انہاں دے قومی ݙیہوار تے مبارکباد ڈیندیں ہوئیں آکھیا جو پاکستان جنوبی افریقہ دے نال آپݨے دوستانہ تعلقات کوں بہوں اہمیت ݙیندے جیڑھے جو سانجھی اقدار، باہمی اعتماد، تے امن، ترقی و کثیر الجہتی تعاون دے مشترکہ عزم تے مبنی ہن۔صدر آصف علی زرداری جنوبی افریقہ اچ نسل پرست (اپارتھائیڈ) حکومت دے دور اچ پاکستان دے اصولی مؤقف دا ذکر کریندیں ہوئیں آکھیا جو 1948 اچ ای پاکستان جنوبی افریقہ دی نسل پرست حکومت دے نال نال اسرائیل کوں تسلیم کرݨ توں انکار کر ݙتا ہا۔ صدر آصف علی زرداری آکھیا جو لوکاں کوں ہݨ وی پاکستانی پاسپورٹ تے لڳی او مہر یاد اے جیندے تے لکھیا ہوندا ہا جو اے پاسپورٹ جنوبی افریقہ (نسل پرست) تے اسرائیل کیتے کارآمد کائنی اتے اے 1994 اچ جنوبی افریقہ اچ نسل پرستی دے خاتمے تک جاری ریہا۔ صدر آصف علی زرداری ایں یقین دا اظہار کیتا جو ݙوہائیں ملکاں وچال اڄوکےتعلقات آوݨ آلے سالاں اچ بئ تگڑے تھیسن، جیڑھے جو ݙوہیں قوماں دے عوام کیتے بئی خوشحالی تے فلاح و بہبود دا سبب ٻݨسن۔