ای سی سی دی پی آئی اے کیتے فنڈنگ دی منظوری، مہنگائی اچ ڳھٹکی دے آثار تے اطمینان

اسلام آباد۔27 اپریل (اے پی پی) کابینہ دی اقتصادی رابطہ کمیٹی (ای سی سی) پی آئی اے ہولڈنگ کمپنی لمیٹڈ (پی آئی اے ایچ سی ایل) کیتے میڈیکل، پنشن تے تنخوہیں دی ادائیگی کیتے فنڈنگ دی منظوری ݙے ݙتی اے، اقتصادی رابطہ کمیٹی مختلف وزارتاں تے ڈویژناں کیتے کئی تجویزاں تے تکنیکی ضمنی گرانٹس دی منظوری وی ݙتی۔ اقتصادی رابطہ کمیٹی دا اجلاس سنوار کوں ایتھاں وفاقی وزیر برائے خزانہ تے محصولات سینیٹر محمد اورنگزیب دی صدارت اچ تھیا۔ وزارتِ منصوبہ بندی، ترقی تے خصوصی اقدامات دے چیف اکانومسٹ اہم معاشی اشاریاں اچ حالیہ رجھاناں بارے بریفنگ ݙتی جیندے اچ خاص طور تے چیزاں دی قیمتاں اچ اتار چڑھاؤ تے مجموعی مہنگائی دی صورتحال دا جائزہ پیش کیتا ڳیا۔ کمیٹی کوں ݙسایا گیا جو ہک لمبے عرصے دی غیر یقینی صورتحال دے بعد اڄوکے اعداد و شمار قیمتاں اچ بتدریج استحکام دی نشاندہی کریندے پئن جیندے اچ وفاقی، صوبائی تے ضلعی سطح تے کیتےڳئے اقدامات دا اہم کردار اے، ادارہ جاتی نظام، خاص طور تے نیشنل پرائس مانیٹرنگ کمیٹی دے ذریعے مارکیٹ دی نگرانی تگڑی تھئی اے اتے ویلے سر مداخلت ممکن ٻݨائی ڳئی اے۔ اجلاس کوں ݙسایا گیا جو مہنگائی دا دباؤ ہووݨ دے باوجود ایندے اچ ڳھٹکی دے آثار نمایاں تھیندے پئن اتے ابھردے ہوئے رجھان قیمتاں دے بہتر استحکام دے پاسے اشارہ کریندے پئن۔ کمیٹی کوں ݙسایا گیا جو ہفتہ وار نگرانی دے اعداد و شمار توں ظاہر تھیندے جو عارضی اضافے دے بعد ضروری چیزاں دی قیمتاں اچ اضافے دی رفتار سست تھی ڳئی اے، حالیہ ہفتیاں وچ قیمتاں دے حساس اشاریے (ایس پی آئی) وچ ڳھٹکی دا رجھان ݙٹھا گئے، کئی ضروری چیزاں جنہاں اچ ٹماٹر، پیاز، اٹا، لہسن، ایل پی جی وغیرہ شامل ہن، دی قیمتاں اچ ڳھٹکی ریکارڈ کیتی ڳئی اے جڈانجو کھنڈ دی قیمت اچ وی ڳھٹکی دا رجھان سامݨے آئے۔ انڈے، ککڑ، دالاں، ککنگ آئل، روٹی تے کھیر ایجھی چیزاں دی قیمتاں اچ صرف معمولی ودھارا تھیے جیڑھا مجموعی طور تے قیمتاں دے دباؤ اچ ڳھٹکی دی نشاندہی کریندے۔اجلاس اچ معمول دے ایجنڈے دے نکات تے غور کیتا ڳیا اتے مختلف وزارتاں تے ڈویژناں کیتے کئی تجویزاں دی منظوری ݙتی گئی جنہاں اچ تکنیکی ضمنی گرانٹس دی منظوری شامل ہئی۔ اجلاس اچ کابینہ ڈویژن دے تحت کینابیز کنٹرول اینڈ ریگولیٹری اتھارٹی (سی سی آر اے) دی تنصیبات اچ سہولتاں دی مرمت تے اینکوں فعال ٻݨاوݨ کیتے 10 کروڑ روپے، وزارتِ خزانہ دی سمری تے صوبے اچ تعینات پی اے ایس تے پی ایس پی افسراں کیتے وزیرِ اعظم دے منظور شدہ مراعاتی پیکج دی معاونت دے حوالے نال حکومتِ بلوچستان کیتے 31 کروڑ 10 لکھ روپے، وزارتِ قانون و انصاف دی سمری تے ڈیجیٹل ٹرانسفارمیشن تے مصنوعی ذہانت (AI) تے مبنی نظام دے نفاذ کیتے قومی احتساب بیورو (نیب) کیتے 37 کروڑ 20 لکھ روپے اتے بین الصوبائی رابطہ دی وزارت دی سمری تے اٹھ سال بعد ایف آئی ایچ ہاکی ورلڈ کپ کیتے کوالیفائی کرݨ تے پاکستان قومی ہاکی ٹیم کوں مالی انعامات ڈیوݨ کیتے 3 کروڑ روپے دی تکنیکی ضمنی گرانٹس دی منظوری ݙتی ڳئی، وزیرِ اعظم پہلے ای ایندی منظوری ݙتی ہئی۔ اجلاس اچ وزارتِ دفاع توں پاکستان انٹرنیشنل ایئرلائنز کارپوریشن لمیٹڈ (پی آئی اے سی ایل) دے واجبات دی ادائیگی کیتے پی آئی اے ہولڈنگ کمپنی لمیٹڈ (پی آئی اے ایچ سی ایل) دے حق اچ 5 ارب 98 کروڑ 50 لکھ روپے مختص کرݨ دی سمری دا جائزہ گھدا ڳیا۔ کمیٹی مجموعی رقم اچوں طبی تے پنشن دی ادائیگیاں دی واپسی دے نال نال تنخواہاں دی ادائیگی کیتے فنڈنگ دی منظوری ݙے ݙتی اتے قومی انشورنس کمپنی لمیٹڈ (این آئی سی ایل) کوں آڈیٹرز دی سفارشات دے مطابق ادائیگی دے معاملے کوں متعلقہ ریونیو اتھارٹی نال ایڈجسٹمنٹ کیتے چاوݨ دی ہدایت کیتی۔اجلاس اچ وزارتِ تجارت توں امپورٹ پالیسی آرڈر (آئی پی او) 2022 اچ پاکستان دے بین الاقوامی ادارہ محنت (آئی ایل او) دے کنونشنز دے تحت کیتے گئے وعدیاں دے مطابق ترمیم متعلق سمری دی منظوری وی ݙتی گئی، ایندا مقصد جبری مشقت دے ذریعے تیار کیتی گئی چیزاں دی درآمد تے پابندی دی شق کوں شامل کرݨ اے۔ وزارتِ تجارت توں پیش کیتی ڳئی ہک بئی سمری اچ امپورٹ کم ایکسپورٹ سکیم (آئی پی او) 2022 تے ایکسپورٹ فسیلیٹیشن سکیم (ای ایف ایس) 2021 اچ ترامیم دی منظوری وی ݙتی ڳئی جیندے تحت پائلٹ منصوبے دے تحت استعمال شدہ گاݙیاں تے آٹو پارٹس کوں مرمت، بحالی تے بعد اچ ولا برآمد کیتے عارضی طور تے درآمد کرݨ دی اجازت ݙتی ویسی جڈانجو ہک سال بعد ایں منصوبے دا جائزہ گھنݨ دی ہدایت وی کیتی ڳئی۔اجلاس اچ قومی غذائی تحفظ و تحقیق توں پیش کیتی گئی سمری دا وی جائزہ گھدا ڳیا جیندے اچ گوادر ڈنکی سلاٹر ہاؤس توں گدھے دے گوشت تے کھلیاں دی برآمد متعلق سفارشات دی منظوری منگی ڳئی ہئی۔ کمیٹی موجودہ ذخیرے کوں متعلقہ قواعد و ضوابط تے برآمدی پروٹوکول دے مطابق ویچݨ دی تجویز دی منظوری ݙے ݙتی۔ اجلاس اچ پاور ڈویژن دی جانب توں پیش کیتی ڳئی ہک سمری تے وی غور کیتا ڳیا جیندے اچ سابق واپڈا ڈسٹری بیوشن کمپنیاں (ایکس ڈبلیو ڈسکوز) دے نال پبلک سروس آبلیگیشن (پی ایس او) معاہدے متعلق معاملہ شامل ہئی۔ کمیٹی ایں معاملے کوں ریاستی ملکیتی اداریاں متعلق کابینہ دی کمیٹی (سی سی او ایس او ایز) کوں بھیجݨ دی ہدایت کیتی۔ اجلاس کوں ݙسایا گیا جو سی سی او ایس او ایز ایں موضوع کیتے مناسب فورم اے۔ اجلاس اچ وزیرِ تجارت جام کمال خان، وفاقی وزیرِ توانائی سردار اویس احمد خان لغاری، وفاقی وزیرِ قومی غذائی تحفظ و تحقیق رانا تنویر حسین (ویڈیو لنک)، وفاقی وزیرِ منصوبہ بندی، ترقی و خصوصی اقدامات پروفیسر احسن اقبال چوہدری (ویڈیو لنک)، وزیرِ اعظم دے معاون خصوصی برائے صنعت و پیداوار ہارون اختر خان، وفاقی سیکریٹریز اتے متعلقہ وزارتاں، ڈویژناں اتے ریگولیٹری اداریاں دے سینئر حکام شرکت کیتی۔