وزیرِ اعظم شہباز شریف دی قیمتی پتھراں دی برآمدات اچ اضافے کیتے لائحہ عمل ٻݨاوݨ دی ہدایت

اسلام آباد۔27 اپریل (اے پی پی) وزیرِ اعظم محمد شہباز شریف قیمتی پتھراں دی برآمدات اچ اضافے کیتے لائحہ عمل ٻݨاوݨ دی ہدایت کریندیں ہوئیں آکھیا جو پاکستان کوں اللہ تعالیٰ قیمتی پتھراں سمیت قدرتی وسیلیاں دی دولت نال مالا مال کیتے، مقامی وسیلیاں نال برآمدات اچ اضافہ کیتا ونج سڳدے، سینٹرز آف ایکسیلنس دے قیام اچ شفافیت کوں یقینی ٻݨایا ونجے۔ سنوار کوں وزیرِ اعظم آفس دے میڈیا ونگ توں جاری بیان دے مطابق اے ڳالھیں انہاں پاکستان اچ قیمتی پتھراں دی کان کنی و پراسیسنگ دی بین الاقوامی معیار نال ہم آہنگی تے انھاں دی برآمدات اچ اضافے دے عزم دے نال ملک اچ ترائے سینٹرز آف ایکسیلنس دے قیام بارے جائزہ اجلاس دی صدارت کریندیں ہوئیں کیتا۔ وزیرِ اعظم آکھیا جو پاکستان کوں اللہ تعالیٰ قیمتی پتھراں سمیت قدرتی وسیلیاں دی دولت نال مالا مال کیتے، اے ایجھا شعبہ اے جیندے اچ مقامی وسیلیاں نال برآمدات اچ اضافہ کیتا ونج سڳدے۔ معاون خصوصی ہارون اختر اتے انہاں دی ٹیم دے ایں شعبے دی ترقی کیتے اقدامات تعریف دے لائق ہن، سینٹرز آف ایکسیلنس دے قیام اچ شفافیت دے عنصر کوں اہمیت ݙتی ونجے۔ وزیرِ اعظم پاکستانی قیمتی پتھراں دی پراسیسنگ دے بعد برآمدات اچ اضافے کیتے لائحہ عمل ٻݨآوݨ دی ذمہ داری وزارتِ منصوبہ بندی کوں ݙے ݙتی اے۔ وزارتِ منصوبہ بندی جلدی جامع لائحہ عمل ٻݨا تے وزیرِ اعظم کوں پیش کریسی۔ اجلاس کوں قیمتی پتھراں دی پراسیسنگ تے کان کنی دے جدید طریقے رائج کرݨ دے حوالے نال بریفنگ ݙتی گئی۔ اجلاس کوں ݙسایا گیا جو قیمتی پتھراں دی کٹائی، تراش خراش تے انھاں کوں زیورات اچ سجاوݨ دے قابل ٻݨآوݨ دے حوالے نال حکومت ترائے سینٹرز آف ایکسیلنس دا قیام عمل اچ گھن آندی پئی اے۔ گلگت بلتستان تے آزاد کشمیر اچ سینٹرز کیتے زمین دی نشاندہی کیتی ڳئی اے۔ ایندے توں علاوہ اسلام آباد اچ سینٹر دے قیام کیتے زمین لبھݨ دا کم جاری اے۔ اجلاس کوں ݙسایا گیا جو انھاں سینٹرز آف ایکسیلنس اچ قیمتی پتھراں دی بین الاقوامی معیار دی پراسیسنگ کیتے تربیت فراہم کیتی ویسی۔ اجلاس کوں ݙسایا گیا جو جولائی 2026 اچ پاکستان اچ قیمتی پتھراں دے حوالے نال پہلی بین الاقوامی نمائش وی کروائی ویندی پئی اے۔ ایندے توں علاوہ سری لنکا تے چین دے تعاون نال مخصوص قیمتی پتھراں دی پراسیسنگ دے حوالے نال افرادی قوت دی تربیت کیتے اقدامات کیتے ویندے پئن۔ اجلاس کوں قیمتی پتھراں دے ڳھٹ توں ڳھٹ ضیاع دے نال کان کنی دے حوالے نال وزارتِ پٹرولیم دے اقدامات تے وی بریفنگ ݙتی گئی۔ اجلاس اچ وفاقی وزراء احسن اقبال، ڈاکٹر مصدق ملک، جام کمال خان، علی پرویز ملک، وزیرِ مملکت بلال اظہر کیانی، معاون خصوصی ہارون اختر، گورنر سٹیٹ بینک جمیل احمد، گلگت بلتستان تے آزاد کشمیر دے چیف سیکریٹریز اتے متعلقہ اعلیٰ حکام شرکت کیتی۔