حکومت یورپی یونین نال تجارتی تے سرمایہ کاری تعلقات ودھاوݨ کیتے سنجیدہ کوششاں جاری رکھیسی، وزیرِ اعظم محمد شہباز شریف

اسلام آباد۔28 اپریل (اے پی پی) وزیرِ اعظم محمد شہباز شریف یقین ڈیوایا جو حکومت یورپی یونین نال تجارتی تے سرمایہ کاری دے تعلقات کوں ودھاوݨ کیتے سنجیدہ کوششاں جاری رکھیسی۔ او یورپی یونین دے سینئر حکام تے ممتاز یورپی کمپنیاں دے کاروباری نمائندیاں تے مشتمل وفد نال گالھ مہاڑ کریندے پئے ہن جنہاں منگل کوں انھاں نال ملاقات کیتی۔ پی ایم آفس دے میڈیا ونگ توں جاری بیان دے مطابق وفد دی قیادت یورپی کمیشن دے ڈائریکٹوریٹ جنرل آف انٹرنیشنل پارٹنرشپس دے ڈائریکٹر (ایشیا پیسفک) پیٹرس سٹبس کریندے پئے ہن، ڈائریکٹر انٹرنیشنل پارٹنرز یورپین انویسٹمنٹ بینک تھوریا تریکی، ایڈیڈاس دے نائب صدر مینیول پاؤزر، ایندرتز دے نائب صدر کارل شلوگل باؤر تے آئیکیا (IKEA) دے ریجنل ڈائریکٹر ڈائیٹر میٹکے وی وفد وچ شامل ہن۔ نائب وزیرِ اعظم تے وزیرِ خارجہ سینیٹر محمد اسحاق ڈار، وزیرِ تجارت جام کمال خان، وزیرِ قانون، انصاف تے انسانی حقوق اعظم نذیر تارڑ، وزیرِ مملکت برائے خزانہ بلال اظہر کیانی، معاونینِ خصوصی سید طارق فاطمی تے ہارون اختر خان تے پاکستان اچ تعینات یورپی یونین دے سفیر ریمنڈس کیروبلس وی ملاقات اچ موجود ہن۔ وزیرِ اعظم یورپی یونین دے وفد دا خیرمقدم کریندیں ہوئیں یورپی یونین پاکستان بزنس فورم اچ شرکت تے انھاں دا شکریہ ادا کیتا۔ انہاں آکھیا جو یورپی یونین پاکستان دا سب توں وݙا تجارتی پارٹنر اے تے پاکستان توں برآمدات دے سب توں زیادہ حجم دی منزل اے۔ یورپی یونین پاکستان بزنس فورم دے انعقاد کوں سراہندیں ہوئیں وزیرِ اعظم محمد شہباز شریف امید ظاہر کیتی جو اے تقریب پاکستان تے یورپی یونین وچال تجارتی تے سرمایہ کاری دے تعلقات کوں بئیا ودھاوݨ دی حوصلہ افزائی کریسی۔ انہاں وفد کوں یقین ڈیوایا جو حکومت یورپی یونین نال تجارتی تے سرمایہ کاری دے تعلقات کوں فروغ ڈیوݨ کیتے سنجیدہ کوششاں جاری رکھیسی۔ وزیرِ اعظم محمد شہباز شریف یورپی یونین دے وفد کوں مشرقِ وسطیٰ دی صورتحال پاروں تیل دی قیمتاں اچ اڄوکے اضافے سمیت علاقائی چیلنجاں دے باوجود معیشت دے استحکام کیتے کم جاری رکھݨ دے حکومتِ پاکستان دے پکے عزم دا یقین ڈیوایا۔ ایں سلسلے اچ وزیرِ اعظم خاص طور تے یورپی یونین کونسل دے صدر انتونیو کوسٹا دے نال آپݨے ݙو حالیہ ٹیلی فونک رابطیاں دا ذکر کیتا جنہاں اچ علاقائی سلامتی دی صورتحال دے نال نال پاکستان تے یورپی یونین دے تعلقات کوں بئیا تگڑا کرݨ دے طریقیاں بارے تفصیلی ڳالھ کیتی ڳئی۔ خطے اچ امن دی کوششاں وچ وزیرِ اعظم محمد شہباز شریف دے قائدانہ کردار کوں سراہندیں ہوئیں یورپی یونین دے وفد یورپی یونین پاکستان بزنس فورم دی میزبانی اچ بھرپور تعاون کرݨ تے حکومت دی تعریف کیتی۔ وفد دے ارکان پاکستان اچ سرمایہ کاری دے آپݨے تجربے بارے ڈسیندیں ہوئیں آکھیا جو یورپی یونین تے پاکستان دے درمیان توانائی، مواصلات تے آئی ٹی وغیرہ سودھے مختلف شعبیاں اچ بی ٹو بی (B2B) تعلقات کوں بئیا فروغ ڈیوݨ دے قوی امکانات ہن۔