اسلام آباد۔28 اپریل (اے پی پی) پاکستان اتے نیوزی لینڈ ݙوپاسہ تعلقات کوں بئیا مستحکم ٻݨاوݨ کیتے کٹھے کم کرݨ تے اتفاق کیتے۔ منگل کوں وزیرِ اعظم محمد شہباز شریف کوں نیوزی لینڈ دے ہم منصب کرسٹوفر لیوکسان ٹیلیفون کیتا۔ پی ایم آفس دے میڈیا ونگ توں جاری بیان دے مطابق ݙوہیں رہنماواں وچال تھیوݨ آلی خوشگوار تے دوستانہ ڳالھ مہاڑ دے دوران مشرقِ وسطیٰ دی بدلدی صورتحال تے ڳالھ …
پاکستان تے نیوزی لینڈ دے وزرائے اعظم وچال ٹیلیفونک رابطہ، ݙوپاسہ تعلقات مستحکم ٻݨاوݨ کیتے کٹھے کم کرݨ تے اتفاق
مزید خبراں
اسلام آباد۔28 اپریل (اے پی پی) پاکستان اتے نیوزی لینڈ ݙوپاسہ تعلقات کوں بئیا مستحکم ٻݨاوݨ کیتے کٹھے کم کرݨ تے اتفاق کیتے۔ منگل کوں وزیرِ اعظم محمد شہباز شریف کوں نیوزی لینڈ دے ہم منصب کرسٹوفر لیوکسان ٹیلیفون کیتا۔ پی ایم آفس دے میڈیا ونگ توں جاری بیان دے مطابق ݙوہیں رہنماواں وچال تھیوݨ آلی خوشگوار تے دوستانہ ڳالھ مہاڑ دے دوران مشرقِ وسطیٰ دی بدلدی صورتحال تے ڳالھ کیتی ڳئی۔ وزیرِ اعظم محمد شہباز شریف کرسٹوفر لیوکسان کوں خطے اچ امن دے فروغ تے کشیدگی اچ ڳھٹکی کیتے پاکستان دی جاری سفارتی کوششاں تے رابطیاں بارے ݙسیا۔ نیوزی لینڈ دے وزیرِ اعظم پاکستان دی تعمیری سفارتی کوششاں، خاص طور تے واشنگٹن تے تہران دے نال رابطیاں کوں سراہیا اتے ثالثی دی انھاں کوششاں دی کامیابی کیتے نیک تمناواں دا اظہار کیتا۔ وزیرِ اعظم محمد شہباز شریف نیوزی لینڈ دے وزیرِ اعظم دا شکریہ ادا کریندیں ہوئیں خطے تے دنیا اچ امن، مکالمے تے استحکام دے فروغ کیتے پاکستان دے غیر متزلزل عزم دا اعادہ کیتا۔ ݙوہیں رہنماواں پاکستان تے نیوزی لینڈ وچال ݙوپاسہ تعلقات کوں بئیا تگڑا ٻݨاوݨ کیتے کٹھے کم کرݨ تے اتفاق اتے ڈوہیں ملکاں وچال دوستانہ تے خوشگوار تعلقات تے اطمینان دا اظہار کیتا۔ ایں حوالے نال نیوزی لینڈ اچ رہݨ آلی پاکستانی کمیونٹی دے مثبت کردار کوں وی سراہیا ڳیا۔ وزیرِ اعظم کرسٹوفر لیوکسان کوں پاکستان دے سرکاری دورے دی دعوت ݙتی۔ ݙوہیں رہنماواں آوݨ آلے ڈینہوار اچ قریبی رابطے اچ رہݨ تے وی اتفاق کیتا۔
