صدرِ مملکت آصف علی زرداری دا چینی رہنما ماؤ زے تُنگ دے آبائی شہر شاؤشان دا دورہ، چیئرمین ماؤ دے مجسمے تے گلدستہ رکھیا

شاؤشان۔28 اپریل (اے پی پی) صدرِ مملکت آصف علی زرداری چین اچ چیئرمین ماؤ زے تُنگ دے آبائی شہر شاؤشان دا دورہ کیتا جتھاں انہاں اسٹیچو سکوائر اچ چیئرمین ماؤ دے مجسمے تے گلدستہ رکھیا اتے چینی انقلابی رہنما کوں خراجِ عقیدت پیش کیتا۔ منگل کوں ایوانِ صدر دے پریس ونگ توں جاری بیان دے مطابق صدرِ مملکت دا استقبال سینئر پارٹی رہنما لی جیانگ اتے ڈائریکٹر شاؤشان ایڈمنسٹریشن ژانگ شی ہوئی کیتا۔ انہاں صدرِ مملکت کوں چیئرمین ماؤ زے تُنگ دی زندگی تے جدوجہد توں آگاہ کیتا اتے شاؤشان اچ انہاں دے ابتدائی دور تے انھاں عوامل تے روشنی سٹی جنہاں انہاں دی سیاسی سوچ کوں ٻݨایا۔ صدرِ مملکت کوں ایں گالھ تے وی بریفنگ ݙتی ڳئی جو ایجھے یادگاری ادارے تاریخی مواد کوں محفوظ رکھݨ تے چین دی انقلابی تاریخ متعلق عوامی آگاہی ودھاوݨ اچ اہم کردار ادا کریندے پئن۔ اسٹیچو سکوائر تے تھیوݨ آلی تقریب دے بعد صدرِ مملکت ماؤ زے تُنگ میموریل میوزیم دا دورہ کیتا جتھاں انہاں کوں عوامی جمہوریہ چین دے بانی رہنما دی زندگی، فکر تے سیاسی ورثے متعلق ݙسایا ڳیا۔ انہاں تاریخی نوادرات، ریکارڈ تے تصویراں ڈٹھیاں جنہاں اچ چین دی انقلابی تاریخ دے اہم مرحلیاں کوں پیش کیتا ڳیا ہئی۔ صدر آصف علی زرداری چیئرمین ماؤ زے تُنگ دے چین دی تاریخی تبدیلی اچ کردار کوں خراجِ تحسین پیش کریندیں ہوئیں عوامی جمہوریہ چین دی جدوجہد، اتحاد تے ترقی اچ انہاں دی خدمات کوں سراہیا۔ انہاں آکھیا جو ایجھی ڄہیں دا تحفظ جدید چین دی تشکیل اچ کردار ادا کرݨ آلے عوامل کوں سمجھݨ اچ مدد ݙیندے تے قومی ترقی اچ تاریخی شعور دی اہمیت کوں اجاگر کریندے۔ صدر دے ہمراہ سینیٹر سلیم مانڈوی والا، سندھ دے سینئر وزیر شرجیل انعام میمن، علی حسن بروہی، وزیراعلیٰ سندھ دے معاونِ خصوصی برائے سرمایہ کاری و پبلک پرائیویٹ پارٹنرشپ پراجیکٹس سید قاسم نوید قمر، چیف سیکرٹری سندھ، پاکستان اچ چین دے سفیر جیانگ زائی دونگ اتے چین اچ پاکستان دے سفیر خلیل ہاشمی وی موجود ہن۔