سی ڈی اے ریکارڈ دی ڈیجیٹائزیشن 120 ݙینہ اچ کیتی ویسی، اسلام آباد اچ کہیں وی غیر قانونی ہاؤسنگ سوسائٹی کوں کم کرݨ دی اجازت کائنا ہوسی، وفاقی وزیرِ داخلہ محسن نقوی

اسلام آباد۔29 اپریل (اے پی پی) وفاقی وزیرِ داخلہ محسن نقوی آکھیا جو سی ڈی اے (CDA) ریکارڈ دی ڈیجیٹائزیشن 120 ݙینھ اچ مکمل کیتی ویسی، اسلام آباد اچ کہیں وی غیر قانونی ہاؤسنگ سوسائٹی کوں کم کرݨ دی اجازت ہرگز نہ ݙتی ویسی۔ بدھ کوں وفاقی وزیرِ داخلہ دی صدارت اچ تھئے چار گھنٹے طویل اجلاس اچ اسلام آباد اچ جاری عوامی منصوبیاں تے نویں منصوبیاں دا تفصیلی جائزہ ڳھدا ڳیا۔ اجلاس اچ فیصلہ کیتا ڳیا جو سی ڈی اے دا سارا ریکارڈ ڈیجیٹل کیتا ویسی تانجو شہری خود آپݨی درخواستاں دی اپ ڈیٹیڈ صورتحال معلوم کر سڳن۔ محسن نقوی آکھیا جو ریکارڈ دی ڈیجیٹائزیشن 120 ڈینہ اچ تھی ویسی۔ اجلاس اچ ݙسایا ڳیا جو نویں کنونشن سینٹر، ایکسپو سینٹر تے اسلام آباد ارینہ دی تعمیر کیتے ترائے بین الاقوامی کمپنیاں دی پری کوالیفکیشن مکمل تھی ڳئی اے۔ وزیرِ داخلہ ایندی تعمیر ایس سی او (SCO) سمٹ توں پہلے مکمل کرݨ دی ہدایت کیتی۔ اجلاس اچ ایف-6 اچ خدمت مرکز پراجیکٹ کیتے ڄاہ مختص کرݨ دا فیصلہ کیتا ڳیا۔ انھاں جدید تفریحی سہولتاں جیویں ٹاپ گالف، ہاٹ ایئر بیلون، زپ لائن، واٹر پارک تے امیوزمنٹ پارک تے کم جلدی شروع کرݨ دی ہدایت کیتی اتے آکھیا جو کھیڈاں دے فروغ کیتے جدید سپورٹس کمپلیکس ٻݨائے ویسن۔ وزیرِ داخلہ ایف-9 پارک کوں ہائیڈ پارک دی طرز تے ڈویلپ کرݨ تے شاہدرہ ڈیم دے نال تفریحی سہولتاں دا جامع پلان وی طلب کر ڳھدا۔ انھاں ایکسپریس وے تے کلب روڈ دی بیوٹیفیکیشن تے لائٹنگ تے وی کم فوراً شروع کرݨ دا حکم ݙتا۔ انھاں سی ڈی اے اچ کرپشن سکینڈل بے نقاب کرݨ تے چیئرمین سی ڈی اے سہیل اشرف تے ممبر سٹیٹ زمان وٹو کوں مبارکباد ݙتی اتے آکھیا جو کرپشن اچ ملوث کہیں بندے کوں رعایت نہ ݙتی ویسی۔