مشرقِ وسطیٰ اچ امن دی کوششاں جاری ہن، جنگ نال معاشی بہتری دی کوششاں کوں شدید نقصان تھیے، اوکھے ویلھے توں سرخرو تھی تے نکلسوں، وزیرِ اعظم شہباز شریف دا وفاقی کابینہ دے اجلاس توں خطاب

اسلام آباد۔29 اپریل (اے پی پی) وزیرِ اعظم محمد شہباز شریف آکھیا جو پاکستان مشرقِ وسطیٰ اچ جنگ بندی تے قیامِ امن کیتے متواتر کوششاں کیتن جیڑھیاں اجاں وی جاری ہن، جنگ پاروں اساݙا معاشی ترقی دا پندھ رُک ڳئے، پٹرولیم دی قیمتاں آسمان نال ڳالہیں کریندیاں پئن، مسائل پہاڑ ٻݨ تے سامݨے کھڑن لیکن مشکل وقت توں سرخرو تھی تے نکلسوں۔ سعودی عرب دے تعاون نال ساݙھے ترائے ارب ڈالر دا بیرونی قرضہ لہا ݙتے، کفایت شعاری دے اقدامات جاری رہسن۔ بدھ کوں وفاقی کابینہ دے اجلاس توں خطاب کریندیں ہوئیں وزیرِ اعظم ارکان کوں صورتحال تے اعتماد اچ ڳھدا اتے ݙسایا جو حالیہ ہفتیاں اچ اہم واقعات تھئے، امریکا تے ایران وچال پاکستان ڳالھ مہاڑ دا جیڑھا طویل سلسلہ 11 اپریل دی رات شروع کرایا ہئی او 21 گھنٹے طویل ہئی۔ اے ہک میراتھن سیشن ہئی جیندے کیتے بے پناہ کوششاں کیتی ڳئی، فیلڈ مارشل سید عاصم منیر ہمت نئی ہاری اتے ڈینہ رات کوششاں کیتی، نائب وزیرِ اعظم تے وزیرِ خارجہ سینیٹر محمد اسحاق ڈار وی آپݨے ہم منصباں نال مصروف رہیے، اساݙی کوششاں نال جنگ بندی اچ توسیع تھئی جیڑھی اجاں وی جاری اے۔ وزیرِ اعظم آکھیا جو ایں دوران ایران دے وزیرِ خارجہ عباس عراقچی وی آپݨی ٹیم نال آئے، انھاں نال وی میراتھن سیشن تھئے، ہفتے دے ڈینہ او میکوں وی ملیے اتے ݙو گھنٹے دی ملاقات اچ تفصیلی ڳالھ مہاڑ تھئی۔ وزیرِ داخلہ دا وی ایں حوالے نال اہم کردار ریہا۔ ایرانی وزیرِ خارجہ عمان وی ڳئے اتے واپس پاکستان آئے ول روس ڳئے۔ انھاں نال میݙی فون تے ڳالھ تھئی تاں انھاں آکھیا جو او اخلاص نال ملاقاتاں کریندے پئن اتے مشورہ کر تے جواب ݙیسن۔ وزیرِ اعظم ݙسایا جو ایں دوران خام تیل دی قیمتاں ولا آسمان نال ڳالہیں کریندی پئن، اساکوں وی نویں قیمتاں دا تعین کرݨے، ٻہوں چیلنجنگ صورتحال دا سامݨا اے لیکن اجتماعی بصیرت نال صورتحال تے قابو پاوݨ دی کوشش کریندے پئیوں۔ انھاں وزیرِ پٹرولیم دی کارکردگی کوں سراہیا اتے آکھیا جو اساݙے اقدامات پاروں پاکستان اچ صورتحال تسلی بخش رہی تے کڈاہیں لائناں نئی لڳی۔ وزیرِ اعظم آکھیا جو صورتحال ایجھی اے جو جنگ توں پہلے ہک ہفتے دا پٹرولیم بل جیڑھا 300 ملین ڈالر ہوندا ہئی، اج 800 ملین ڈالر تئیں پڄ ڳئے، حکومت کفایت شعاری تے بچت دے ذریعے کوشاں اے، ایں کیتے ٹاسک فورس وی ٻݨائی اے جیڑھی صورتحال دا جائزہ گھندی پئی اے، حکومتی اقدامات پاروں کھپت اچ نمایاں ڳھٹکی آئی اے۔ وزیرِ اعظم آکھیا جو اللہ تعالیٰ دی مہربانی نال پاکستان دی معیشت میکرو لیول تے پیریں تے کھڑی تھی ڳئی ہئی تے اساں گروتھ (ودھارے) دے پاسے ٹردے پئے ہاسے لیکن جنگ پاروں بے تحاشا متاثر تھیوں اتے معاشی بہتری کیتے اساڈی ݙو سال دی اجتماعی کوششاں کوں شدید نقصان تھیے جیڑھا اساݙے اختیار توں باہر ہئی۔ وزیرِ اعظم آکھیا جو او دعاگو ہن جو جنگ مستقل بند تھیوے تے امن قائم تھیوے تانجو اساݙا ترقی دا پندھ ولا توں رواں تھیوے۔ وزیرِ اعظم کابینہ کوں ݙسایا جو پاکستان ساݙھے ترائے ارب ڈالر دے بیرونی قرضے ادا کر ݙتن، فیڈرل ریزروز وی آپݨی ڄاہ تے ہن، ایں کیتے اساں سعودی عرب دے حکمران شاہ سلمان بن عبدالعزیز السعود تے ولی عہد تے وزیرِ اعظم محمد بن سلمان دے شکر گزار ہیسے جنھاں اساݙا مسئلہ فوراً حل کیتا۔ وزیرِ اعظم آکھیا جو مسائل دے پہاڑ سامݨے ہن لیکن جلدی حل تھی ویسن۔ امن کیتے کوششاں جاری رہسن، ہمت بدھی رکھݨی ہوسی۔ انہاں آکھیا جو مشیرِ نجکاری محمد علی ڈسایا اے جو پی آئی اے دی نجکاری نال قومی خزانے تے بوجھ نہ پوسی۔ وزیرِ اعظم صوبیاں نال رابطے کیتے ٻݨائی ڳئی کمیٹی کوں ہدایت کیتی جو کفایت شعاری تے عوام کوں ریلیف ڈیوݨ کیتے سبسڈی جاری رکھݨ تے ڳالھ مہاڑ کیتی ونجے۔ پبلک ٹرانسپورٹ تے موٹر سائیکل آلیاں دا خیال رکھیا ونجے۔ عوام نال جیڑھی کمٹمنٹ کیتی اے او پوری کیتی ویسی۔