پاکستان دا امن، سلامتی تے جمہوری تسلسل ایندے بہادر پتراں تے دِھیریں دی قربانیاں پاروں قائم اے: قائم مقام صدر سید یوسف رضا گیلانی دا یومِ شہداء تے سنیھا

اسلام آباد۔ 29 اپریل (اے پی پی) قائم مقام صدرِ پاکستان، سید یوسف رضا گیلانی یومِ شہداء دے موقع تے وطنِ عزیز دے عظیم شہداء کوں بھرپور خراجِ عقیدت پیش کریندیں ہوئیں آکھیا جو پاکستان دا امن، سلامتی تے جمہوری تسلسل ایندے بہادر پتراں تے دھیریں دی قربانیاں پاروں قائم اے‏۔ آپݨے سنیھے اچ قائم مقام صدر ایں گالھ تے زور ݙتا جو دہشت گردی دے خلاف جنگ تے دفاعِ وطن وچ ݙتی ڳئی قربانیاں صرف نظریات کائنی بلکہ قوم کیتے ہک زندہ حقیقت ہن‏۔ انہاں آکھیا جو میدانِ جنگ توں گھن کراہیں اساݙیاں گلیاں تے شہراں تئیں اساݙے شہداء آپݨی جاناں دا نذرانہ ایں کیتے ݙتا تانجو پاکستان وقار تے عزم نال قائم رہ سڳے‏۔ انہاں آکھیا جو مسلح افواج، پولیس تے قانون نافذ کرݨ آلے اداریاں ولوں ݙکھائی ونڄݨ آلی ہمت تے استقامت ریاست دی رٹ کوں فیصلہ کن طور تے مضبوط کیتے اتے انتہا پسندی دی قوتاں کوں پچھوں دِھک ݙتے‏۔ انہاں آکھیا جو اساݙے شہداء صرف جغرافیائی حداں دا دفاع کائنی کیتا بلکہ انھاں نظریہِ پاکستان، آئینی نظام تے عوام دے پرامن زندگی گزارݨ دے حق دی حفاظت کیتی اے‏۔ شہداء دے خانداناں کوں خراجِ تحسین پیش کریندیں ہوئیں قائم مقام صدر انھاں دی بے مثال ہمت دا اعتراف کیتا‏۔ انہاں آکھیا جو قوم ہر سوگوار خاندان دے ݙکھ اچ برابر دی شریک اے‏۔ قائم مقام صدر آکھیا جو یومِ شہداء صرف یاد مناوݨ دا ݙینہہ کائنی بلکہ اے قومی تجدیدِ عہد دا لمحہ اے‏۔ اساں کوں آپݨے اداریاں کوں مضبوط بݨا کراہیں، قانون دی حکمرانی کوں مقدم رکھ کراہیں شہداء دے اعتماد کوں اڳوں ودھاوݨا پوسی‏۔ انہاں شہداء دے درجات دی بلندی کیتے دعا کریندے ہوئیں اعادہ کیتا جو انھاں دی قربانیاں ہمیشہ پاکستان دی طاقت دی بنیاد رہسن‏۔