وزیراعظم شہباز شریف ولوں “اپنا گھر سکیم” دا باقاعدہ اجراء، ہک کروڑ روپے تئیں دا قرضہ سوکھی شرائط تے ملسی، اطلاق اسلام آباد، چاریں صوبیاں، گلگت بلتستان تے آزاد کشمیر اچ ہوسی، تقریب نال خطاب

اسلام آباد۔ 30 اپریل (اے پی پی) وزیراعظم محمد شہباز شریف ملک دے غریب تے متوسط طبقے کوں آپݨی چھت کیتے “وزیراعظم اپنا گھر سکیم” دا باقاعدہ اجراء کر ݙتے جݙاں جو وزیراعظم آکھیا جو عام آدمی کوں چھت فراہم کرݨ حکومت دی اولین ترجیح اے‏۔ سکیم دے تحت ہک کروڑ روپے تئیں دا قرضہ سوکھی شرائط تے دستیاب ہوسی، پہلے سال 50 ہزار گھراں دا ہدف مقرر کیتا ڳئے، آندے چار سالاں اچ ہدف 5 لکھ گھراں دا ہوسی، 10 مرلے تئیں دے گھر تعمیر کیتے ونڄ سڳسن اتے ایندے کیتے فنانسنگ دا حجم 3.2 کھرب روپے ہوسی‏۔ قرضے دی واپسی دی مدت 20 سال ہوسی، پہلے 10 سال مارک اپ 5 فیصد تے اگلے 10 سال مارک اپ مارکیٹ دی شرح دے مطابق ہوسی‏۔ سکیم دا اطلاق وفاقی دارالحکومت اسلام آباد سمیت چاریں صوبیاں، گلگت بلتستان تے آزاد کشمیر اچ وی ہوسی‏۔ تعمیراتی شعبے نال معیشت دا پہیہ چلدے، حکومت برآمد کنندگان دی حوصلہ افزائی کریندی پئی اے، سکیم تے عملدرآمد دا ہر مہینے خود جائزہ گھنسوں‏۔ اے ڳالھیں انہاں خمیس کوں اتھاں وزیراعظم اپنا گھر سکیم دے اجراء دی تقریب نال خطاب کریندیں ہوئیں کیتا‏۔ تقریب اچ نائب وزیراعظم و وزیرِ خارجہ محمد اسحاق ڈار، وفاقی وزراء، اراکینِ پارلیمنٹ تے ٻیاں اہم شخصیات شریک ہن‏۔ وزیراعظم اپنا گھر سکیم دے تحت قرضہ حاصل کرݨ آلے کامیاب امیدواراں کوں مبارکباد ݙتی‏۔ انہاں آکھیا جو “وزیراعظم اپنا گھر سکیم” دے اجراء دی تقریب اچ شرکت میݙے کیتے خوشی دی ڳالھ اے، عوام کوں اپنا گھر فراہم کرݨ کہیں وی حکومت تے ریاست دا بنیادی تے مقدس فریضہ اے، پاکستان دی 24 کروڑ آبادی اچوں ٻہوں وݙی تعداد اپݨی چھت توں محروم اے، ایں حوالے نال اج دی اے تقریب انتہائی یادگار اے، ایں سکیم دے اجراء کیتے ٻہوں زیادہ محنت کیتی گئی اے اتے ٻہوں سارے مسائل سامݨے ہن لیکن انھاں کوں نجی شعبے دی مشاورت تے ٻئے متعلقہ بندیاں تے حکام دے تعاون نال حل کیتا ڳئے۔ وزیراعظم آکھیا جو ہک نوجوان ڈرائیور غلام حسین کوں وی اللہ تعالیٰ اپنا گھر بݨاوݨ دا موقع فراہم کیتے اتے اوں کوں قرضہ ملیے، چیک حاصل کرݨ آلیاں اچ آزاد کشمیر تے خیبر پختونخوا دے لوک وی شامل ہن، ایں سکیم دا اطلاق وفاقی دارالحکومت اسلام آباد سمیت چاریں صوبیاں، گلگت بلتستان تے آزاد کشمیر اچ وی تھیسی‏۔ وزیراعظم آکھیا جو “گھر ہووے تاں اپنا” ایں سکیم دا تسلسل اے جئیں دا میں پنجاب توں آغاز کیتا ہئی اتے ایندا ناں آشیانہ رکھا ڳیا ہئی اتے ایندا موثر آغاز کیتا گیا ہئی تے مختلف مقامات تے خود ایں سکیم دا سنگِ بنیاد رکھیا اتے چابیاں لوکاں دے حوالے کیتیاں‏۔ وزیراعظم آکھیا جو ایں سکیم دے تحت پہلے سال 50 ہزار گھراں دا ہدف مقرر کیتا ڳئے جئیں کیتے 321 ارب روپے مختص کیتے ڳئن، بھرپور تعاون تے معاونت تے وفاقی وزیرِ خزانہ، وفاقی وزیرِ ہاؤسنگ تے گورنر سٹیٹ بینک دا شکریہ ادا کرینداں‏۔ آندے چار سالاں اچ اساݙا ہدف 5 لکھ گھراں دا ہوسی‏۔ سکیم دے تحت 10 مرلے تئیں دے گھر تعمیر کیتے ونڄ سڳسن اتے ایندے کیتے فنانسنگ دا حجم 3.2 کھرب روپے ہوسی‏۔ وزیراعظم آکھیا جو او ہر مہینے ایں سکیم دا جائزہ گھنسن تانجو جے کہیں قسم دی کوئی رکاوٹ ہووے تاں اوںکوں دور کیتا ونڄے اتے ادائیگیاں بروقت تھیون، وزیراعظم اپنا گھر سکیم دے تحت قرضے دے حصول دا طریقہ کار سوکھا بݨایا ڳئے‏۔ قرضے دی واپسی دی مدت 20 سال ہوسی پہلے 10 سال مارک اپ 5 فیصد تے اگلے 10 سال مارکیٹ دی شرح دے مطابق ہوسی، ہک کروڑ روپے تئیں قرضہ گھدا ونڄ سڳسی، زیادہ قرضہ فراہم کرݨ آلے بینکاں کوں 14 اگست کوں قومی ایوارڈ ݙتا ویسی تے جیڑے بینک ایندے اچ سستی ݙکھیسن انھاں دے نال کوئی رعایت نہ تھیسی‏۔ وزیراعظم آکھیا جو آندے بجٹ اچ وی مختلف سکیماں کوں شامل کیتا ویسی‏۔ انہاں آکھیا جو تعمیراتی شعبے نال معیشت دا پہیہ چلدے، ایندے نال ٻہوں سارے شعبے جڑے ہوندے ہن، ایندے نال اساݙی صنعت و حرفت کوں ترقی ملدی اے تے لوکاں کوں روزگار دے موقع ملدے ہن‏۔ تقریب نال خطاب کریندیں ہوئیں وفاقی وزیرِ ہاؤسنگ و تعمیرات ریاض حسین پیرزادہ آکھیا جو ہک سال دی انتھک محنت دے بعد وزیراعظم اپنا گھر سکیم دا اجراء کیتا ویندا پئے‏۔ اپنا گھر تعمیر کرݨ دے خواہش مند بندیاں کیتے اے حکومت دا تحفہ اے‏۔ سکیم دے اجراء وچ وزیراعظم دی خصوصی دلچسپی اساݙے کیتے مشعلِ راہ اے‏۔ تقریب اچ وزیراعظم اپنا گھر سکیم دا باقاعدہ اجراء کیتا‏۔ ایں موقع تے وزیراعظم اپنا گھر سکیم دے تحت اہل بندیاں اچ مختلف بینکاں دے چیک وی ونڈیے‏۔