پولیو دے موذی مرض دے ملک توں جلدی مکمل خاتمے کیتے پر عزم ہیسے، سیسے دا سدباب ہک چیلنج اے جیندے کیتے ہر ممکن اقدام چیسوں، وزیر اعظم محمد شہباز شریف دی یونیسیف دے وفد نال ڳالھ مہاڑ

اسلام آباد۔ 30 اپریل (اے پی پی) وزیراعظم محمد شہباز شریف انسدادِ پولیو کوں اولین ترجیح قرار ݙیندیں ہوئیں آکھیا جو ایں موذی مرض دے ملک توں جلدی مکمل خاتمے کیتے پر عزم ہیسے، سیسے (Lead) دا سدباب ہک چیلنج اے جیندے کیتے ہر ممکن اقدام چیسوں‏۔ اے ڳالھیں انہاں یونیسیف دے وفد نال ڳالھ مہاڑ کریندیں ہوئیں کیتا‏۔ وفد دی قیادت پاکستان اچ یونیسیف دی نمائندہ پرنیل آئرنسائیڈ کریندی پئی ہئی جݙاں جو سیسے توں بچاؤ کیتے قائم سیکرٹریٹ دے ڈائریکٹر عبداللہ فاضل، سٹینفورڈ یونیورسٹی سکول آف میڈیسن توں جینا فارسیتھ تے ٹامس ہرڈ وفد اچ شامل ہن‏۔ ملاقات اچ وفاقی وزراء احسن اقبال، مصطفیٰ کمال تے عائشہ رضا فاروق توں علاوہ متعلقہ اعلیٰ حکام وی شریک ہن‏۔ وزیراعظم آفس دے میڈیا ونگ توں جاری بیان دے مطابق وزیر اعظم وفد دے پاکستان آوݨ دا خیر مقدم کیتا‏۔ وزیر اعظم آکھیا جو حکومت قوم دے ٻالاں دے مستقبل کوں محفوظ بݨاوݨ کیتے ترجیحی بنیاداں تے اقدامات کریندی پئی اے‏۔ انہاں آکھیا جو پاکستان انسدادِ پولیو کوں آپݨی اولین ترجیح سمجھدے اتے انشاء اللہ جلد ایں موذی مرض دے ملک توں مکمل خاتمے کیتے پر عزم اے، سیسے دے اثرات دی وجہ توں ٻالاں اچ ذہنی تے جسمانی نشونما دے مسئلے پیدا تھیندن، ایندا سدباب ہک چیلنج اے جیندے کیتے ہر ممکن اقدام چیسوں‏۔ انہاں آکھیا جو حکومت آپݨے عالمی شراکت داراں دے تعاون نال سیسے دے اثرات کوں روکݨ کیتے اقدامات دے حوالے نال پر عزم اے‏۔ وفد دے شرکاء وزیر اعظم دا شکریہ ادا کیتا اتے پاکستان اچ آپݨے حالیہ دورے دے دوران سروے دے حوالے نال اجلاس کوں آگاہی ݙتی‏۔ وفد وزیر اعظم دی قیادت اچ موجودہ حکومت دے ٻالاں کوں پولیو سمیت موذی بیماریاں توں بچاوݨ کیتے اقدامات کوں تعریف دے لائق قرار ݙتا اتے آکھیا جو پاکستان اچ ٻالاں دے بیماریاں توں بچاؤ تے انھاں دی نشونما کیتے خطرات دے سدباب کیتے اقدامات ݙیکھ کراہیں خوشی تھئی اے‏۔ شرکاء ایں رائے دا اظہار کیتا جو وزیر اعظم دی قیادت اچ حکومتِ پاکستان صحت، تعلیم، نینگراں دی تربیت تے آئی ٹی دے شعبے اچ وݙے اقدامات کریندی پئی اے‏۔ وفد وزیر اعظم کوں سیسے دے صحت تے نقصان دہ اثرات تے بریفنگ ݙتی اتے پاکستان اچ ایندے پھیلاؤ دے علاقیاں دی نشاندہی کیتی‏۔ شرکاء عوام اچ سیسے دے نقصانات بارے آگاہی دی اہمیت تے وی زور ݙتا‏۔