آئی بی سی سی سالانہ رپورٹ 2025 جاری کر ݙتی، امتحانی نظام اچ جدید تبدیلیاں تے ٹیکنالوجی دا استعمال

اسلام آباد۔ 30 اپریل (اے پی پی) آئی بی سی سی آپݨی سالانہ رپورٹ 2025 جاری کر ݙتی اے، جیڑی پاکستان دے امتحانی تے تشخیصی نظام اچ ہک اہم تبدیلی دے سال دی عکاسی کریندی اے‏۔ رپورٹ دے مطابق، آئی بی سی سی رٹہ سسٹم توں ہٹ کراہیں سمجھ تے مبنی (تصوراتی) تعلیم کوں فروغ ݙتے‏۔ ایں مقصد کیتے ملک بھر اچ ماڈل اسیسمنٹ فریم ورک (MAF) نافذ کیتا ڳیا‏۔ ایندے تحت اساتذہ تے امتحانی ماہرین کوں جدید طریقیاں جیویں اسٹوڈنٹ لرننگ آؤٹ کمز (SLOs)، بلومز ٹیکسانومی تے بہتر سوال بݨاوݨ دی تربیت ݙتی ڳئی، جیندے نال امتحانات کوں زیادہ شفاف تے معیاری بݨایا ڳیا‏۔ سال 2025 اچ ہک وݙی پیش رفت ون ونڈو ڈیجیٹل ویریفکیشن، اٹیسٹیشن تے ایکویویلنس سسٹم دا آغاز ہئی‏۔ ایندے نال طلبہ کیتے تمام خدمات سوکھیاں، شفاف تے آن لائن تھی گئیاں ہن، تے ہݨ تصدیق دا عمل وی تیز تے محفوظ تھی ڳئے‏۔ آئی بی سی سی نیشنل آئٹم بینک قائم کر تے ٹیکنالوجی دے استعمال کوں ودھا کراہیں امتحانی نظام کوں مزید مضبوط بݨائے‏۔ ایندے توں علاوہ غیر ملکی امتحانی بورڈز کیتے وی ہک نواں نظام متعارف کروایا ڳیا تانجو انھاں دی اسناد قومی معیار دے مطابق تھیون‏۔تقریب نال خطاب کریندیں ہوئیں ڈاکٹر غلام علی ملاح، ایگزیکٹو ڈائریکٹر آئی بی سی سی آکھیا جو سالانہ رپورٹ 2025 ایں ڳالھ دی عکاسی کریندی اے جو اساں پاکستان دے امتحانی نظام کوں شفاف، منصفانہ تے عالمی معیار دے مطابق بݨیندے پئیوں‏۔ اساں ایجھا نظام چاہندے ہئیں جیڑا نینگراں دی ضروریات کوں پورا کرے تے ملک دی ترقی اچ مدد ݙیوے‏۔ رپورٹ اچ طلبہ کیتے مختلف اقدامات دا وی ذکر کیتا ڳئے، جیندے اچ میرٹ تے پروگرامز، ٻاہرلے ملک تعلیمی موقع تے نمایاں طلبہ کیتے سہولیات شامل ہن‏۔ ایندے نال نال پاکستان دے ہائر سیکنڈری اسکول سرٹیفکیٹ (HSSC) دی عالمی سطح تے سنڄاݨ بہتر بݨاوݨ کیتے وی کم کیتا ڳیا‏۔ ادارے دے اندر وی اہم فیصلے کیتے ڳئے، جیویں گریڈنگ نظام اچ بہتری، امتحانات دے شیڈول، ایکویویلنس پالیسیز تے ریسرچ ونگ دا قیام‏۔ اے اقدامات آئی بی سی سی دے کردار کوں ٻیا مضبوط بݨیندن‏۔ اے رپورٹ ہک جدید، ٹیکنالوجی تے مبنی امتحانی نظام دی جھلک پیش کریندی اے جیڑا شفاف، مؤثر تے عالمی معیار دے مطابق اے‏۔