محنت کشاں دی فلاح کیتے قانون سازی تے سماجی تحفظ کوں مضبوط کیتا ویسی، قائم مقام صدر یوسف رضا گیلانی

اسلام آباد۔ 1 مئی (اے پی پی) قائم مقام صدر سید یوسف رضا گیلانی آکھیا جو یکم مئی محض ہک ݙینہہ کائنی بلکہ محنت، جدوجہد، انسانی وقار تے سماجی انصاف دے عزم دی تجدید دا استعارہ اے، محنت کشاں دی فلاح و بہبود کیتے قانون سازی، ادارہ جاتی اصلاحات تے سماجی تحفظ دے نظام کوں ٻیا مضبوط بݨایا ویسی‏۔ جمعہ کوں یومِ مزدور دے موقع تے آپݨے سنیھے اچ انہاں آکھیا جو یکم مئی دا ݙینہہ پوری دنیا اچ محنت کشاں نال یکجہتی دے اظہار دے طور تے منایا ویندے، اے ݙینہہ اساں کوں انھاں عظیم قربانیاں دی یاد ݙویندے جیہڑیاں مزدوراں آپݨے بنیادی حقوق دے حصول کیتے پیش کیتیاں‏۔ انہاں آکھیا جو قومی ترقی، معاشی استحکام تے خوشحالی محنت کش طبقے دی محنت تے لگن نال جڑی ہوئی اے‏۔ محنت کش درحقیقت کہیں وی معیشت دی ریڑھ دی ہڈی ہوندن، انھاں دی فلاح دے بغیر ترقی دا کوئی تصور مکمل نئی تھی سڳدا‏۔ یوسف رضا گیلانی آکھیا جو دینِ اسلام تے آئینِ پاکستان محنت کشاں دے احترام، انھاں دے حقوق دے تحفظ تے سماجی انصاف دی فراہمی تے زور ݙیندے ‏۔ پارلیمان ہمیشہ مزدوراں تے کمزور طبقیاں دے حقوق کیتے موثر آواز بلند کیتی اے‏۔ انہاں بیرونِ ملک مقیم پاکستانی محنت کشاں کوں وی خراجِ تحسین پیش کیتا اتے آکھیا جو او زرمبادلہ دی صورت اچ ملکی معیشت دے استحکام اچ اہم کردار ادا کریندے پئن‏۔