بجلی دی پیداوار اچ بہتری دے بعد لوڈ مینجمنٹ دا خاتمہ تھیے، اویس لغاری

اسلام آباد۔ 1 مئی (اے پی پی) وفاقی وزیرِ توانائی اویس احمد خان لغاری آکھیا جو گزریل ݙینہہ ایل این جی گیس ملݨ نال بجلی دی پیداوار اچ بہتری دے بعد ہݨ لوڈ مینجمنٹ دا خاتمہ تھی ڳئے‏۔ سابق وزیراعظم میاں محمد نواز شریف دے پچھلے دور اچ ملک توں لوڈ شیڈنگ ختم تھی گئی ہئی، 6 سال بعد ولوں لوڈ شیڈنگ دا سامݨا کرݨا پیا، لوڈ شیڈنگ دی وجہ گیس دی ڳھٹکی جیڑھی امریکہ ایران جنگ دی وجہ توں کائنی ملدی پئی ، ویلھے تے کیتے ڳئے اقدامات دی وجہ توں عوام کوں اڳوں لوڈ شیڈنگ دا سامݨا نہ کرݨا پوسی‏۔ جمعہ کوں لوڈ مینجمنٹ دے خاتمے دے حوالے توں جاری ویڈیو بیان اچ وفاقی وزیر آکھیا جو اج توں 13 توں 14 ݙینہہ پہلے عوام کوں لوڈ شیڈنگ دا سامݨا کرݨا پوندا پیا ہئی، 13 تے 14 اپریل کوں پنج پنج گھنٹے دی لوڈ شیڈنگ کرݨی پئی، 17، 18 تے 19 اپریل کوں کوئی لوڈ مینجمنٹ کائنی تھئی، جݙݨ جو 19 اپریل توں 29 اپریل تئیں لوڈ شیڈنگ کوں ڈو توں ڈھائی گھنٹے تئیں محدود کر ݙتا ڳیا‏۔ انہاں آکھیا جو 15 ݙینہہ پہلے پریس کانفرنس کر تے وزارت دا موقف سامݨے رکھیا ہئی اتے ݙسایا ہئی جو لوڈ شیڈنگ اساݙی کہیں کوتاہی یا سسٹم دی خرابی دی وجہ توں کائنی، جے اساں ڈیزل یا فرنس آئل نال بجلی بݨیندے تاں اے ٻہوں مہنگی ہوندی جیندے نال صارفین تے بھار پے سڳدا ہئی‏۔ اویس لغاری آکھیا جو ہݨ پن بجلی (Hydro) نال بجلی دی پیداوار چھے ہزار میگا واٹ تئیں پڄ ڳئی اے جیڑی ایندے توں پہلے ہک ہزار میگا واٹ ہئی‏۔ انہاں آکھیا جو کجھ لوک غلط فہمیاں کھنڈیندے ہن جو اساݙے کول بجلی بݨاوݨ دی صلاحیت 46 ہزار میگا واٹ اے، اے تاثر غلط اے، بجلی دی پیداوار 32 ہزار میگا واٹ اے‏۔