صدر آصف علی زرداری پنڄ ݙینھ دا سرکاری دورہ مکمل کرݨ دے بعد چین توں پاکستان روانہ تھی ڳئے

اسلام آباد۔ 1 مئی (اے پی پی) صدرِ مملکت آصف علی زرداری پنڄ ݙینھ دا سرکاری دورہ مکمل کرݨ دے بعد چین دے شہر سانیا توں پاکستان روانہ تھی ڳئے‏۔ جمعہ کوں ایوانِ صدر دے پریس ونگ توں جاری بیان دے مطابق صدرِ مملکت کوں سانیا ایئرپورٹ تے کمیونسٹ پارٹی آف چائنا ہائنان دے سینئر رہنما وانگ چیانگ الوداع کیتا‏۔ ایں موقع تے پاکستان اچ چین دے سفیر جیانگ زائی ڈونگ تے چین اچ پاکستان دے سفیر خلیل ہاشمی تے چینی وزارتِ خارجہ دے اعلیٰ حکام وی موجود ہن‏۔ صدر زرداری دے دورہِ چین دے دوران ہونان تے ہائنان اچ صنعتی، زرعی تے بحری معیشت دے شعبیاں اچ تعاون کوں فروغ ݙیوݨ تے ڳالھ مہاڑ کیتی گئی‏۔ صدرِ مملکت دورہِ چین دے دوران شاؤشان اچ چیئرمین ماؤ زے تنگ دے آبائی شہر دا دورہ کیتا اتے انھاں کوں خراجِ تحسین پیش کیتا‏۔ سی پیک 2.0 دے تحت اندرونِ ملک صنعتی ترقی تے بلیو اکانومی (بحری معیشت) تے پیش رفت دورے دا اہم مرکز رہی‏۔ چانگشا اچ دورے دے دوران پاکستان تے چین دے اداریاں دے درمیان سمندری پاݨی کوں قابلِ استعمال بݨاوݨ، زرعی ٹیکنالوجی تے چاہ (ٹی) دے شعبے اچ تعاون ودھاوݨ کیتے ترائے مفاہمتی یادداشتاں تے دستخط کیتے ڳئے‏۔ سانیا اچ صدرِ مملکت دی موجودگی اچ مشینری، زناوراں دی ویکسینز تے طبی ٹیکنالوجی دے شعبیاں اچ تعاون کیتے مفاہمت دی ڈو یادداشتاں تے مشترکہ سرمایہ کاری دے ہک معاہدے تے دستخط کیتے ڳئے‏۔ صدرِ مملکت چانگشا تے سانیا اچ صوبائی سطح تے پارٹی قیادت نال تفصیلی ملاقاتاں کیتی‏۔ صدر آصف علی زرداری سانیا اچ پاک بحریہ دی پہلی ہنگور کلاس آبدوز دی کمیشننگ تقریب اچ بطور مہمانِ خصوصی شرکت وی کیتی‏۔ صدر دے دورے نال پاکستان تے چین دے سفارتی تعلقات دی 75 ویں سالگنڈھ دے پس منظر اچ مختلف شعبیاں اچ تعاون کوں ٻیا ودھاوݨ تے ڳالھ مہاڑ تھئی‏۔