آلودگی توں پاک بندرگاہواں معاشی ترقی اتے محفوظ بحری ماحول کیتے لازمی ہین، وفاقی وزیر برائے بحری امور

اسلام آباد۔ 4 مئی(اے پی پی)وفاقی وزیر برائے بحری امور محمد جنید انوار چوہدری صاف اتے پائیدار سمندری ماحول کیتے حکومتی عزم دوہریندے آکھیے جو آلودگی توں پاک بندرگاہواں محفوظ جہاز رانی اتے معاشی ترقی کیتے ضروری ہین۔ انہاں کراچی پورٹ ٹرسٹ دے میرین پولوشن کنٹرول ڈیپارٹمنٹ دی ہفتہ وار صفائی مہم دی کارکردگی دی تعریف کیتی جیندے اچ حساس بندرگاہی علاقیاں توں 16 ہزار 430 کلوگرام ٹھوس ڳند کُڄا کٹھا کیتا ڳئے، ایندے اچ پلاسٹک دا ملبہ، تردا ہویا فضلہ، نامیاتی کچرا اتے استعمال شدہ ماہی گیری دا سامان شامل ہئی، جیہڑا سمندری ماحولیاتی نظام، بندرگاہی سرگرمیاں اتے ساحلی حیاتیاتی تنوع کیتے خطرہ ٻݨدے۔ صفائی مہم اچ ڈمپنگ و ٹرانسفر سائٹ، ایسٹ وارف، ویسٹ وارف اتے بوٹ بیسن جیٹی سودھا اہم مقامات کوں ہدف ٻݨایا ڳئے جتھاں جہازاں دی آمدورفت، کارگو ہینڈلنگ اتے شہری ٹریفک پاروں آلودگی دے خطرے ودھ ویندن۔ ایں آپریشن اچ 54 بیڑیاں اتے 164 اہلکاراں مختلف شفٹاں اچ حصہ ڳھدے تاں جو سارے علاقیاں دی مؤثر صفائی مکمل تھیوے۔ انہاں آکھیا جو اے اقدامات ماحولیاتی تحفظ دے حوالے نال کے پی ٹی دے فعال کردار دی عکاسی کریندے ہن، جیہڑے پاکستان دے پائیدار بحری اہداف تے بینکوں ݙکھیندن۔ انہاں آکھیا جو حکومت سمندری حیات دے تحفظ، محفوظ جہاز رانی اتے صاف بندرگاہ دے قیام کیتے شراکت داراں دے تعاون اتے عوامی آگاہی نال اپݨیاں کوششاں جاری رکھیسی۔