معرکہ حق دی کامیابی: آئی بی سی سی اسلام آباد اچ خصوصی تقریب، معرکہ حق ڄھیاں قومی کامیابیاں ساݙے کیتے مشعلِ راہ ہن، ڈاکٹر غلام علی ملاح

اسلام آباد۔9 مئی(اے پی پی)انٹر بورڈز کوآرڈینیشن کمیشن (آئی بی سی سی) اسلام آباد اچ معرکۂ حق دی کامیابی دے حوالے نال ہک خصوصی تقریب تھئی، جیندے اچ ادارے دے سارے افسراں اتے اہلکاراں شرکت کیتی۔ تقریب اچ معرکہ حق دی شاندار کامیابی اتے پاکس فوج دی شاندار پیشہ ورانہ خدمات، قومی یکجہتی کوں خراج تحسین پیش کرݨ کیتے تقریراں کیتیاں گیاں اتے قومی جذبے دا اظہار کیتا گیا، تقریب اچ مقررین ملک دی ترقی اتے سربلندی دا عزم دوہرایا۔ ایں موقع تے تقریب نال خطاب کریندے ہوئیں ڈاکٹر غلام علی ملاح، ایگزیکٹو ڈائریکٹر آئی بی سی سی آکھیا جو دفاع اتے سفارتکاری دے میدان اچ پاکستان کوں عالمی سطح تے جیہڑی عزت اتے وقار ملیے، او ساݙی عسکری اتے سیاسی قیادت دی بہترین حکمت عملی، عزم اتے بصیرت دا نتیجہ اے۔ انہاں افواجِ پاکستان اتے قومی قیادت کوں ملک دی سلامتی، وقار اتے قومی مفادات دے تحفظ تے بھرپور خراجِ تحسین پیش کیتے۔ ڈاکٹر ملاح آکھیا جو قومی کامیابیاں اساں ساریاں کیتے مشعلِ راہ ہن اتے ساکوں زندگی دے ہر شعبے اچ بہترین کارکردگی ݙکھا تے پاکستان کوں ٻیا مضبوط اے باوقار ٻݨاوݨا ہوسی۔ انہاں خاص طور تے طلبہ تے زور ڈتا جو او محنت دے نال ذہانت، جدت اتے بہترین حکمت عملی دے ذریعے علمی اتے عملی میدان اچ نمایاں کامیابیاں حاصل کرن تاں جو ملک دا ناں روشن تھیوے۔ آخر اچ معرکہ حق دا ہک سال مکمل تھیوݨ تے کیک وی کٹیا ڳیا اتے شرکاء پُرجوش انداز اچ “پاکستان ہمیشہ زندہ باد” دے نعرے لا تے اپݨی حب الوطنی، قومی یکجہتی اتے ملک دی ترقی دا عزم دوہرایا۔