صدرِ مملکت آصف علی زرداری دا معرکہ حق دی پہلی سالگرہ تے قوم اتے مسلح افواج کوں خراجِ تحسین

اسلام آباد۔9 مئی(اے پی پی)صدرِ مملکت آصف علی زرداری معرکہ حق دی پہلی سالگرہ دے موقع تے قوم اتے مسلح افواج کوں خراجِ تحسین پیش کریندے ہوئیں فیلڈ مارشل سید عاصم منیر دی قیادت، حکمتِ عملی اتے جرات مندانہ فیصلیاں کوں معرکہ حق دی کامیابی اچ کلیدی قرار ݙتے۔ انہاں آکھیا جو پاکستان ہک ذمہ دار اتے امن پسند ریاست اے، دشمن دی جارحیت دا بھرپور ٻھل متوازن جواب ݙے تے دنیا کوں اپݨی دفاعی صلاحیت دا سنیہا ݙتے۔ صدرِ مملکت پاک فضائیہ دے سربراہ ایئر چیف مارشل ظہیر احمد بابر سدھو اتے پاک فضائیہ دے شاہیناں دی غیر معمولی مہارت اتے پیشہ ورانہ صلاحیتاں کوں سراہے۔ انہاں پاک بحریہ دے سربراہ ایڈمرل نوید اشرف اتے بحری افواج دی مکمل آپریشنل تیاری تے دفاعی صلاحیتاں کوں قومی سلامتی سانگے قابلِ فخر قرار ݙتے۔ صدرِ مملکت آکھیا جو مقبوضہ جموں اتے کشمیر دا مسئلہ اقوامِ متحدہ دی قرارداداں دے مطابق حل تھیوݨا چاہیدے، پاکستان کشمیری عوام دی اخلاقی، سیاسی اتے سفارتی حمایت جاری رکھیسی۔ انہاں بھارت ولوں سندھ طاس معاہدے دی معطلی دی کوشش کوں “آبی دہشت گردی” قرار ݙتا اتے آکھیا جو پاݨی کروڑاں پاکستانیاں دی زندگی دا مسئلہ اے۔ افغانستان دے حوالے نال انہاں آکھیا جو افغانستان اپݨی سرزمین پاکستان اتے خطے دے ٻئے ملکاں دے خلاف دہشت گردی سانگے استعمال نہ تھیوݨ ݙیوے، کیوں جو بیرونی پشت پناہی نال چلݨ والی دہشت گردی دا خاتمہ خطے دے امن کیتے ضروری اے۔ انہاں آکھیا جو وزیراعظم شہباز شریف تے فیلڈ مارشل سید عاصم منیر دی کوششاں نال پاکستان خطے اچ توازن تے استحکام دی علامت ٻݨ تے ابھریے۔ ایران اتے امریکہ دے تنازع دے پُرامن حل سانگے پاکستان دی سفارتی کوششاں کوں عالمی سطح تے سراہیا ڳئے۔ انہاں آکھیا جو پاکستانی قوم اتے مسلح افواج ہر چیلنج دا مقابلہ کرݨ اتے وطنِ عزیز دے دفاع سانگے مکمل طور تے تیار ہین۔