معرکہ حق دی فتح دا ہک سال: پاکستان مانومنٹ تے خصوصی تقریب، صدر و وزیراعظم دا خطاب

اسلام آباد۔ 10 مئی(اے پی پی)معرکہ حق دی فتح دا ہک سال مکمل تھیوݨ تے اسلام اباد اچ پاکستان مانومنٹ تے خصوصی تقریب تھئی۔ تقریب اچ صدرمملکت آصف علی زرداری، وزیراعظم شہبازشریف اتے فیلڈ مارشل سید عاصم منیر وی شریک ہن۔ تقریب اچ سربراہ پاک فضائیہ اتے سربراہ پاک نیوی، چیئرمین سینیٹ، سپیکرقومی اسمبلی اتے وفاقی وزراء سودھا غیرملکی سفیر، سول و عسکری حکام سودھا مختلف شعبہ ہائے زندگی دیاں اہم شخصیات وی موجود ہن۔ تقریب دے شروع تے قومی ترانہ پیش کیتا گیا، تریے مسلح افواج دے چاق و چوبند دستیاں مارچ پاسٹ کیتا۔ ایں موقع تے وزیر اعظم محمد شہباز شریف خطاب کیتے اتے آکھیے جو سچ دا ݙیوا کوڑ دی پھوک نال نئیں ٻڄایا ونڄ سڳدا۔ انہاں آکھیا جو دشمن رات دے اندھارے اچ حملہ کیتے ٻھل اوکوں پتا نا ہا جو اے قوم اوکوں اینڄھا ولدا ݙیسی جو او منہ لکاوݨ ڄوڳے نا رہسن، ساݙی مسلح افراد رات دے اندھارے اچ کیتے گئے حملے دا بھر پور جواب ݙتے، معرکہ حق تے شاندار فتح تے اللہ تعالیٰ دا شکر ادا کریندے ہیں۔ انہاں آکھیا جو بھارت پہلگام واقعہ دی بنیاد تے پاکستان تے الزامات دی بوچھاڑ کیتی اتے واقعہ دا اڄ تئیں کوئی ثبوت نئیں ݙے سڳیا، اللہ تعالیٰ پاکستان کوں ہک عظیم مقام ݙتے۔ وزیراعظم آکھیا جو اڄ دے ݙینھ ایئر چیف مارشل اتے انہاں دے شاہیناں دا ݙساوݨ ضروری اے، ساݙے جھپٹے تاں دمن کوں جان بچاوݨ اوکھا تھی ڳئے، 10 مئی دا ݙینھ معرکہ حق نال منسوب کریندے ہیں۔ شہباز شریف آکھیا جو ساݙے شہدا مادرِ وطن کیتے جاناں ݙتن، انہاں کوں خراج تحسین پیش کریندے ہیں، صدر ٹرمپ کروڑاں جاناں کوں بچاوݨ اچ اہم کردار ادا کیتے، ݙوہاں ایٹمی ممالک اچ جنگ وݙے نقصان دا باعث ٻݨ سڳدی ہئی، اساں خطے اچ امن چاہندے ہیں۔ وزیراعظم آکھیا جو فیلڈ مارشل دی قیادت کوں تاریخ ہمیشہ سنہری حروف اچ لکھسی، پاکستان ہمسایہ برادر ایران ملک اچ قیام امن کیتے بھرپور کردار ادا کیتے، جنگ بندی دے حوالے نال ایران دا جواب وی مل چکیے۔ شہباز شریف آکھیا جو چینی صدر شی جنگ پنگ ہمیشہ آلی کار اوکھے ویلھے پاکستان دا ساتھ ݙتے، پاک چین دوستی ہمالیہ توں وی اچی اتے شہد توں وی میٹھی اے۔ تقریب نال خطاب اچ صدر مملکت آصف علی زراری آکھیے جو 10مئی پاکستانی تاریخ دا ہک سوھݨا اتے سنہری باب اے۔ انہاں آکھیا جو پہلگام واقعہ دے بعد پاکستان تے جنگ مسلط کیتی گئی، قوم 10 مئی کوں نال ٻھلسی، بھارت پہلگام واقعہ کوں منݙھ ٻما تے پاکستان تے بلا جواز حملہ کیتے، افواج پاکستان بھارتی جارحیت دا حیران کن جواب ݙتے، بزدل دشمن رات دے اندھارے اچ ساݙیاں مسیتاں اتے معصوم شہریاں تے حملہ کیتے ٻھل ساݙا ولدا اینڄھا تکڑا ہا جو پورے ڄڳ ایکوں منیے اتے پورے ڄڳ اچ پاکستان دا ناں اچا تھئے۔ آصف زرداری آکھیا جو افواج پاکستان بھارت دے 8 جدید لڑاکا طیارے مار ݙھوائے، فیلڈ مارشل سید عاصم منیر دی قیادت اچ افواج پاکستان اپݨی مہارت ݙکھائی۔ تقریب اچ شاندار اتشبازی دا مظاہرہ وی کیتا ڳیا اتے اسلام آباد دے شہریاں غلی محلیاں اتے سڑکاں تے کتھے تھی تے اے نظارہ ݙٹھا۔