وفاقی وزیر بحری امور دا گوادر بندرگاہ دے ٹیرف وچ وݙی کمی دا اعلان

اسلام آباد۔ 11 مئی (اے پی پی) وفاقی وزیر بحری امور محمد جنید انوار چوہدری گوادر بندرگاہ دے ٹیرف وچ نمایاں کمی دا اعلان کریندے آکھیے جو ایں اقدام دا مقصد جھکے سمندر دی ایں بندرگاہ کوں خطے دے ہک مضبوط تے مسابقتی لاجسٹکس تے ٹرانس شپمنٹ مرکز دے طور تے مستحکم کرݨ اے۔وزارت ولوں جاری پریس ریلیز موجب وزیر بحری امور اپݨے بیان وچ آکھیا جو نویں ٹیرف پالیسی دے نتیجے وچ گوادر دے ذریعے ٹرانزٹ تے بین الاقوامی ٹرانس شپمنٹ کنٹینر ٹریفک وچ واضح ودھارا متوقع اے، جیندے نال عالمی شپنگ لائناں دی توجہ حاصل کرݨ تے بندرگاہ دی سرگرمیاں کوں ودھاوݨ وچ مدد ملسی۔انہاں ݙسایا جو نویں ٹیرف سٹرکچر دے تحت کنٹینر بردار جہازاں تے ٹرانزٹ یا ٹرانس شپمنٹ کارگو چاوݨ آلے جہازاں دی برتھنگ فیس وچ 25 فیصد کمی کر ݙتی ڳئی اے۔ ایں طرح بین الاقوامی ٹرانس شپمنٹ کنٹینر کارگو دے چارجز وچ 40 فیصد تے ٹرانزٹ کنٹینر کارگو تے 31 فیصد کمی کیتی ڳئی اے۔وفاقی وزیر آکھیا جو کارگو ہینڈلنگ دی صلاحیت ودھاوݨ سانڳے ہک اہم سہولت دے طور تے گوادر بندرگاہ تے جنرل کارگو کوں ہک مہینے تئیں مفت سٹوریج دی سہولت ݙتی ویسی، جݙاں جو ملک دیاں ٻیاں بندرگاہواں تے اے سہولت صرف پنج ݙینھ تئیں محدود اے۔ انہاں واضح کیتا جو اے مراعات وقتی طور تے نافذ العمل ہن تے آپریشنل ڈیٹا تے مارکیٹ دے ردعمل دی بنیاد تے اڳلے مرحلے وچ ٻیاں ترامیم دا جائزہ وی ڳھدا ویسی۔محمد جنید انوار چوہدری آکھیے اقدامات گوادر کوں ہک جدید، سرمایہ کار دوست تے مسابقتی بندرگاہ وچ بدلݨ دی حکمت عملی دا حصہ ہن، جیڑھی وسطی ایشیا، مشرقِ وسطیٰ تے مشرقی افریقہ نال تجارت سانڳے ہک سٹریٹجک گیٹ وے دا کردار ادا کریسی۔ انہاں آکھیا جو گھٹ قیمت تے گھٹ رش آلے رستیں دی طلب دے پیشِ نظر گوادر تجارتی سرگرمیاں وچ وݙا حصہ حاصل کرݨ دی پوری صلاحیت رکھیندے۔ ایں پالیسی نال شپنگ کمپنیاں دے خرچے گھٹ تھیسن تے کارگو دے حجم وچ ودھارا تھیسی۔چیئرمین گوادر پورٹ نورالحق بلوچ آکھیا جو بلوچستان وچ روزگار دے موقع وچ ودھارا متوقع اے کیوں جو نویں ٹیرف سٹرکچر توں تجارتی سرگرمیاں ودھسن۔ فیساں وچ کمی تے سہولتاں وچ بہتری نال نہ صرف مقامی بلکہ بین الاقوامی سرمایہ کار وی متوجہ ہوسن، جیندے نال خطے دی معاشی ترقی تکھے تھیسی تے نینگراں سانڳے روزگار دے نویں دروازے کھلسن