آئی ٹی دے شعبے تے برآمدات وچ ودھارا حکومت دی اولین ترجیح اے، وزیراعظم شہباز شریف

اسلام آباد۔ 11 مئی (اے پی پی) وزیراعظم محمد شہباز شریف آکھیے آئی ٹی دے شعبے تے آئی ٹی برآمدات وچ ودھارا حکومت دی اولین ترجیحات وچ شامل اے، نینگراں وچ آئی ٹی دے حوالے نال بے پناہ صلاحیت موجود اے جیندے توں بھرپور فیدہ چاوݨا چاہیدے، گلگت بلتستان تے آزاد جموں و کشمیر وچ “آسان خدمت مراکز” دے قیام سانڳے کم تکھا کیتا ونڄے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی صدارت وچ وزارت انفارمیشن ٹیکنالوجی تے ٹیلی کام دے امور دے حوالے نال جائزہ اجلاس تھیا۔ اجلاس وچ وفاقی وزیر منصوبہ بندی احسن اقبال، وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی شزا فاطمہ، وزیر مملکت خزانہ بلال اظہر کیانی تے متعلقہ اعلیٰ سرکاری افسراں شرکت کیتی۔اجلاس وچ وزیراعظم آکھیا ملک وچ آئی ٹی دے شعبے دا ودھاراتے آئی ٹی نال جڑی برآمدات وچ ودھارا کرݨ حکومت دی ساریں توں وݙی ترجیح اے۔ پاکستان دے نینگراں وچ آئی ٹی دے حوالے نال ٻہوں ٹیلنٹ موجود اے جیندے توں پورا فیدہ چاوݨ دی لوڑھ اے۔ وزیراعظم ہدایت کیتی گلگت بلتستان تے آزاد کشمیر وچ آسان خدمت مراکز بݨاوݨ دا کم تکھا کیتا ونڄے۔ آسان خدمت دیاں سہولتاں کوں صوبیں وچ وی شروع کرݨ سانڳے صوبائی حکومتاں نال رل تے کم کیتا ونڄے۔ آئی ٹی دے شعبے وچ شہریاں تے دیہاتی لوکاں دے وچال فرق کوں گھٹ کرݨ سانڳے صوبائی تے ضلع دی سطح تے حکومتاں دا تعاون حاصل کیتا ونڄے۔اجلاس کوں ملک وچ آئی ٹی دے ودھارے سانڳے چاتے ڳئے اقدامات تے بریفنگ ݙتی ڳئی۔ اجلاس کوں ݙسیا ڳیا ملک وچ گھریلو انٹرنیٹ کنکشنز دی تعداد 2024 وچ 1.9 ملین توں ودھ تے 2026 وچ 5.10 ملین تھی ڳئی اے، اڄوکے مالی سال پاکستان توں 4.5 توں 4.6 بلین امریکی ڈالرز دی آئی ٹی برآمدات دی امید اے۔ ہݨے ہی پاکستان وچ 5 جی (5G) سروسز سانڳے نیلامی کیتی ڳئی جیڑھی جو ایں حوالے نال 2016 توں ہݨ تئیں تھیوݨ آلی دنیا دی ساریں توں وݙی نیلامی ہئی۔ ایں آکشن توں پاکستان کوں 509 ملین ڈالر ریونیو حاصل تھیا۔مصنوعی ذہانت (AI) دے ودھارے سانڳے فروری 2026 وچ “انڈس اے آئی ویک” دا اہتمام کیتا ڳیا، جیندے وچ 30 شہراں وچ تقریباں تھیاں۔ انڈس اے آئی ویک وچ 100 توں زیادہ بین الاقوامی مندوبین شرکت کیتی تے 88 پولینز بݨائے ڳئے۔ اسلام آباد دے سرکاری سکولاں تے ہیلتھ یونٹس کوں فائبر کنیکٹیویٹی ݙتی ڳئی اے۔ اسلام آباد کوں فری انٹرنیٹ ہاٹ اسپاٹس ݙیوݨ دا کم چھیکڑی مرحلے وچ اے۔ سید پور ماڈل ویلج تے فاطمہ جناح پارک وچ ای-لرننگ پاڈز (e-learning pods) لاتے ویندے پئن