ماحولیاتی چیلنجز نال نبٹݨ تے قدرتی وسائل دے تحفظ کیتے اجتماعی تے مستقل اقدامات دی لوڑھ اے، چیئرمین سینیٹ

اسلام آباد۔ 4 جون (اے پی پی) چیئرمین سینیٹ سید یوسف رضا گیلانی ماحولیاتی چیلنجز نال نبٹݨ تے قدرتی وسائل دے تحفظ کیتے اجتماعی تے مستقل اقدامات دی وقتی لوڑھ تے زور ݙتے تاں جو آوݨ آلی نسلاں کیتے ہک محفوظ تے پائیدار ماحول یقینی بݨایا ونڄ سڳے۔ عالمی یومِ ماحولیات (5 جون) دے موقع تے اپݨے پیغام اچ چیئرمین سینیٹ آکھیا جو ماحولیاتی آلودگی، موسمیاتی تبدیلی، جنگلاں دی کٹائی، پاݨی دی قلت، فضائی و ماحولیاتی آلودگی تے حیاتیاتی تنوع اچ کمی نہ صرف ماحولیاتی نظام ٻلکہ پائیدار ترقی، عوامی صحت، غذائی تحفظ تے معاشی استحکام کیتے وی سنگین خطرات پیدا کریندے پئن۔ انھاں آکھیا جو پاکستان اگرچہ عالمی کاربن اخراج اچ نہایت محدود کردار رکھیندے، تاں جو موسمیاتی تبدیلیاں توں متاثر تھیوݨ آلے ملکاں اچ شامل اے۔سید یوسف رضا گیلانی ماحول دوست پالیسیاں دے ودھارے تے معاشرے دی ہر سطح تے پائیدار طرزِ عمل اپناوݨ دی اہمیت تے زور ݙیندے آکھیا جو ماحول دا تحفظ ہک سانجھی ذمہ واری اے جیں کیتے حکومت، اداریں تے ہر فرد کوں اپݨا کردارادا کرݨا ہوسی۔ چیئرمین سینیٹ ماحولیاتی تحفظ دے حوالے نال آگاہی ودھاوݨ، قدرتی وسائل دے مؤثر استعمال، شجرکاری مہمات، صاف توانائی دے ودھارے تے ویسٹ مینجمنٹ دی لوڑھ تے زور ݙتا۔ عالمی یومِ ماحولیات دے موقع تے سید یوسف رضا گیلانی بالخصوص نوجواناں تے زور ݙتا جو او وݨ رہاوݨ، آلودگی اچ کمی، پاݨی دے تحفظ، تے روزمرہ زندگی اچ ماحول دوست طرزِعمل اپناوݨ جیھے عملی اقدامات دے ذریعے ماحول دے تحفظ اچ فعال کردار ادا کرݨ۔ انھاں ہک ساوا، خوشحال تے ماحولیاتی طور تے محفوظ پاکستان کیتے ماحولیاتی پائیداری تے موسمیاتی استحکام متعلق پالیسیاں تے اقدامات دی حمایت جاری رکھݨ دے سینیٹِ پاکستان دے عزم دا اعادہ وی کیتا۔