پاکستان دا بھارت دی طرفوں دریائے چناب دا پاݨی موڑݨ دے منصوبے دی شدید مذمت، اے اقدام سندھ طاس معاہدے دی سنگین خلاف ورزی اے، ترجمان دفترِ خارجہ طاہر حسین اندرابی دی پریس بریفنگ

اسلام آباد۔ 4 جون (اے پی پی) پاکستان بھارت دی طرفوں دریائے چناب دا پاݨی موڑݨ دے منصوبے دی شدید مذمت کریندے ایں کوں سندھ طاس معاہدے دی سنگین خلاف ورزی قرار ݙتے تے ایں عزم دا اعادہ کیتے جو پاکستان کنے اپݨے آبی حقوق تے قومی مفادات دے تحفظ کیتے سارے آپشنز موجود ہن۔ دفترِ خارجہ دے ترجمان سفیر طاہر حسین اندرابی ہفتہ وار پریس بریفنگ نال خطاب کریندے ہوئیں آکھیا جو بھارت دے مجوزہ چناب-بیاس لنک ٹنل منصوبہ تے بھارت دے غیر قانونی طور تے زیرِ تسلط جموں و کشمیر اچ سلال ڈیم تے سلٹ فلشنگ دے منصوبیں متعلق اطلاعات ظاہر کریندن جو نئی دہلی پاݨی کوں بطورِ ہتھیار استعمال کرݨ دی کوشش کریندا پئے۔ ترجمان آکھیا جو بھارت ہک ایجھے منصوبے کیتے بڈز طلب کیتن جیں دا مقصد دریائے چناب توں سالانہ تقریباً 19 لکھ ایکڑ فٹ پاݨی کوں بیاس اچ منتقل کرݨا اے۔ انھاں ایں اقدام کوں سندھ طاس معاہدے، بین الاقوامی آبی قوانین تے معاہداتی ذمہ واریاں دی خلاف ورزی قرار ݙتا۔ انھاں آکھیا جو پاکستان معاہدے دے تحت اپݨے حقوق تے استحقاق دے تحفظ تے اپݨے اہم قومی مفادات دے دفاع کیتے سارے ضروری آپشنز محفوظ رکھیندے۔ ترجمان عالمی برادری تے زور ݙتا جو او بھارت توں مطالبہ کرے جو او پاکستان دے قانونی حق دے پاݨی وہݨ کوں روکݨ، گھٹ کرݨ یا موڑݨ دے منصوبیں توں دستبردار تھی ونڄے۔ ترجمان خبردار کیتا جو پاکستان دے پاݨی، خوراک تے معاشی تحفظ کوں خطرے اچ سٹݨ دی کوئی وی کوشش خطے دے امن تے استحکام کیتے سنگین نتائج دی حامل تھی سڳدی اے۔جھیڑاجموں و کشمیر دے حوالے نال ترجمان ہک واری ول آکھیا جو اے جھیڑا بین الاقوامی سطح تے تسلیم شدہ اے تے ایں دا حل صرف اقوامِ متحدہ دی سلامتی کونسل دی متعلقہ قرارداداں دے مطابق آزادانہ تے غیر جانبدارانہ استصوابِ رائے دے ذریعے ہی ممکن اے۔ بھارت اچ تعینات سوئس سفیر دے مقبوضہ علاقے دے اڄوکے دورے دے بارے انھاں آکھیا جو ایجھے دوریں توں جموں و کشمیر دی متنازعہ حیثیت تبدیل نی تھیندی۔ انھاں آکھیا جو پاکستان بھارت دے غیر قانونی طور تے زیرِ قبضہ جموں و کشمیر اچ انسانی حقوق دی صورتحال کوں اجاگر کرݨ کیتے سوئس حکومت تے وسیع تر عالمی برادری دے نال رابطے اچ ہے۔ ترجمان مقبوضہ علاقے اچ انسانی حقوق دی مسلسل خلاف ورزیاں، گھراں دی مسماری تے مقامی آبادی دی بے دخلی متعلق اطلاعات تے وی تشویش دا اظہار کریندے آکھیا جو ایجھے اقدامات کشمیر دی آبادیاتی تے ثقافتی شناخت کوں تبدیل کرݨ دی کوششاں دا حصہ ہن۔علاقائی صورتحال تے ڳالھ کریندے طاہر حسین اندرابی آکھیا جو پاکستان افغانستان دے نال مذاکرات تے سفارتکاری کیتے پرعزم اے تاں جو اسلام آباد افغان سرزمین توں تھیوݨ آلے دہشت گرد حملیں کوں نظر انداز نی کر سڳدا۔ انھاں آکھیا جو پاکستان افغانستان تے اپݨے بین الاقوامی شراکت داراں بشمول چین تے یورپی یونین کوں اے پیغام ݙے چکئے جو افغان سرزمین پاکستان دے خلاف دہشت گردی کیتے استعمال نہ ہووݨ دے حوالے نال واضح تے غیر مبہم یقین دہانی ضروری اے۔ افغانستان کیتے چین دے خصوصی نمائندے یوئے شیاویونگ دے نال اڄوکے مشاورت دا حوالہ ݙیندے ترجمان آکھیا جو پاکستان تے چین تحریکِ طالبان پاکستان (ٹی ٹی پی) تے ایسٹ ترکستان اسلامک موومنٹ سودھے دہشت گرد گروہاں دے خلاف تعاون تے رابطہ کاری ودھاوݨ تے اتفاق کیتے۔خلیجی خطے دی صورتحال دے بارے انھاں آکھیا جو حالات نازک تے تشویشناک ہن تاں جو جاری سفارتی کوششاں دے حوالے نال انھاں امید دا اظہار کیتا۔ انھاں آکھیا جو پاکستان جنگ بندی متعلق مفاہمت تے امریکہ و ٻنہیں علاقائی فریقین وچال جاری رابطیں دا خیرمقدم کریندے تے پاکستان مذاکرات دے ودھارے تے امن دی کوششاں دی حمایت کیتے پرعزم اے۔ ایں خبر تے ردِعمل ݙیندے ہوئیں جو نائب وزیراعظم سینیٹر محمد اسحاق ڈار ایران متعلق انٹیلی جنس معلومات امریکہ دے نال شیئر کیتن، ترجمان اِنھاں دعویں کوں بے بنیاد تے قیاس آرائیاں تے مبنی قرار ݙیندے سختی نال مسترد کر ݙتا۔ انھاں واضح کیتا جو پاکستان تے امریکہ وچال تھیوݨ آلی ڳالھ مہاڑ دا محور علاقائی امن، استحکام تے سفارتی حل ہا تے کہیں قسم دی خفیہ معلومات دا تبادلہ نی کیتا ڳیا۔ ترجمان آکھیا جے متعلقہ فریقین درخواست کرن تاں پاکستان خطے اچ امن دے فروغ تے کشیدگی اچ کمی کیتے آئندہ مذاکرات دی میزبانی کیتے وی تیار اے۔ابراہم معاہدیں دے حوالے نال پاکستان دے موقف تے ڳالھ کریندے طاہر حسین اندرابی آکھیا جو اسلام آباد دا موقف تبدیل نی تھیا تے اے 1967ء توں پہلے دی سرحداں تے مشتمل ہک آزاد تے قابلِ عمل فلسطینی ریاست دے قیام نال مشروط اے جیں دا دارالحکومت القدس الشریف ہووے۔ انھاں مقبوضہ فلسطینی علاقیاں اچ اسرائیلی اقدامات دی مذمت کریندے ہوئیں فلسطینی عوام دے حقِ خودارادیت دی حمایت کوں دہرایا۔ یورپی یونین دے نال تعلقات دے بارے ترجمان آکھیا جو پاکستان انسانی حقوق، محنت کشاں دے حقوق، گورننس تے جی ایس پی پلس فریم ورک متعلق امور تے برسلز دے نال رابطے اچ اے۔ انھاں آکھیا جو بین الاقوامی وعدیں تے عملدرآمد اچ پاکستان دی پیشرفت کوں وسیع پیمانے تے تسلیم کیتا ویندا پئے۔