وفاقی وزیر مواصلات دی سعودی وفد کوں ایم 6، ایم 10 تے ایم 13 موٹرویز اچ سرمایہ کاری دی خصوصی پیشکش

اسلام آباد۔ 5 جون (اے پی پی) سعودی پاکستان بزنس کونسل دے چیئرمین پرنس منصور بن محمد السعود دی قیادت اچ وفد وفاقی وزیر مواصلات عبدالعلیم خان نال ملاقات کیتی۔ ملاقات اچ سانجھی دلچسپی دے مختلف امور تے ݙوطرفہ تعلقات دے ودھارے تے تفصیلی ڳالھ مہاڑ کیتی ڳئی ۔ وفاقی وزیر پاکستان اچ موٹرویز دی تعمیر تے ٻنہاں منصوبیں اچ سعودی بزنس کونسل کوں سرمایہ کاری دی پیشکش کیتی۔ پرنس منصور بن محمد السعود آکھیا جو سعودی پاکستان بزنس کونسل مواصلات دے شعبے اچ شراکت داری کرسڳدی اے۔ وفاقی وزیر مواصلات سعودی وفد کوں ایم 6، ایم 10 تے ایم 13 موٹرویز اچ سرمایہ کاری دی خصوصی پیشکش کیتی۔ انھاں آکھیا جو کراچی پورٹ ایم 10، سکھر-حیدرآباد ایم 6 تے کھاریاں-راولپنڈی ایم 13 موٹرویز سرمایہ کاری کیتے موزوں ترین منصوبے ہن۔سعودی بزنس کونسل ایم 6، ایم 10 تے ایم 13 موٹرویز دے منصوبیں اچ سرمایہ کاری اچ دلچسپی دا اظہار کیتا۔ اے منصوبے مواصلات دے شعبے اچ کمرشل نقطہء نظر توں خاصی اہمیت رکھیندن ۔وفاقی وزیر مواصلات آکھیا جو پاکستان تے سعودی عرب وچال دیرپا، پختہ تے آزمودہ تعلقات ہن، ہر پاکستانی دی سعودی عرب نال مذہبی تے گھاٹی دلی وابستگی اے۔ وفاقی وزیر آکھیا جو سعودی سرمایہ کاراں کوں پاکستان اچ قابلِ عمل تے منافع بخش پیشکشں ݙیسوں۔ سعودی عرب توں پاکستان کیتے ہمیشہ خیر سگالی دے جذبات دا اظہار کیتا ڳیا۔ پرنس منصور بن محمد السعود وفاقی وزیر عبدالعلیم خان کوں اپݨے فورم توں ہر ممکن تعاون دا یقین ݙیوائے۔