جرائم پیشہ نیٹ ورکس مصنوعی ذہانت تے ڈیجیٹل پلیٹ فارمز دا غلط استعمال کریندے پئن، وفاقی وزیرِ داخلہ محسن نقوی دا بشکیک اچ اجلاس نال خطاب

بشکیک۔ 5 جون (اے پی پی) وفاقی وزیرِ داخلہ سید محسن نقوی شنگھائی تعاون تنظیم (ایس سی او) دے رکن ملکaN دے وزرائے داخلہ و پبلک سکیورٹی دے خصوصی اجلاس نال خطاب کریندے آکھیے جو اساݙے خطے کوں سنگین تے پیچیدہ سکیورٹی چیلنجز دا سامݨا اے، دہشت گردی، منظم جرائم، منشیات دی سمگلنگ، سائبر کرائم تے ٹیرر فنانسنگ دے خلاف مشترکہ حکمتِ عملی ناگزیر اے۔ محسن نقوی آکھیا جو جرائم پیشہ نیٹ ورکس مصنوعی ذہانت تے ڈیجیٹل پلیٹ فارمز دا غلط استعمال کریندے پئن، بدلدے خطرات نال نبٹݨ کیتے اداریں دی جدید خطوط تے ہم آہنگی ضروری اے۔ انھاں آکھیا جو پاکستان شنگھائی سپرٹ دے اصولاں، سانجھےاعتماد، مساوی شراکت تے خودمختاری تے مکمل کاربند اے۔ وزیرِ داخلہ آکھیا جو پاکستان دہشت گردی تے انتہاپسندی دے خلاف بے مثال قربانیاں ݙتن۔ انھاں آکھیا جو قومی ایکشن پلان دے تحت انٹیلیجنس کوآرڈینیشن، بارڈر مینجمنٹ تے اینٹی منی لانڈرنگ اقدامات کوں تکڑا بݨایا ڳئے۔ ایس سی او راٹس (SCO RATS) دے تحت خفیہ معلومات دے تبادلے تے مشترکہ خطرات دے تجزیے اچ تعاون تے آن لائن انتہاپسندی دے تدارک کیتے مشترکہ اقدامات کوں مزید مؤثر بݨاوݨ دی لوڑھ اے۔ ایں ضمن اچ پاکستان ورکشاپاں تے ماہرین دے تبادلے دے اقدامات دی بھرپور حمایت کریندے۔محسن نقوی آکھیا جو سائبر انٹیلیجنس تے ڈیجیٹل فرانزکس اچ علاقائی تعاون ویلھے دی اہم لوڑھ اے ۔ منشیات دی سمگلنگ دہشت گردی دی مالی معاونت دا وݙا ذریعہ اے۔ منشیات، آن لائن نیٹ ورکس تے کرپٹو ٹرانزیکشنز دے خلاف مشترکہ حکمتِ عملی ضروری اے۔ وفاقی وزیرِ داخلہ آکھیا جو پاکستان دی اینٹی نارکوٹکس فورس ایس سی او سطح تے انسدادِ منشیات اقدامات اچ مکمل متحرک اے۔ انھاں آکھیا جو بارڈر سکیورٹی علاقائی امن و استحکام کیتے کلیدی حیثیت رکھیندی اے۔ وزیرِ داخلہ محسن نقوی نقلی دستاویزات، واچ لسٹ ہم آہنگی تے انسانی سمگلنگ دے خلاف تعاون ودھاوݨ دی لوڑھ تے وی زور ݙتا۔ انھاں آکھیا جو دہشت گرداں دی مالی معاونت روکݨ پاکستان دی اہم ترجیحات اچ شامل اے۔ پاکستان اینٹی منی لانڈرنگ نظام اچ اصلاحات کیتن تے پاکستان دا تکڑا اینٹی منی لانڈرنگ فریم ورک فعال کردار ادا کریندا پئے۔ محسن نقوی آکھیا جو دہشت گرد مالی نیٹ ورک کوں ختم کرݨ کیتے تکڑا علاقائی تعاون ناگزیر اے، اساݙے چیلنجز مشترکہ ہن ایں کیتے اساݙیاں کوششاں وی اجتماعی تے مربوط ہووݨیاں چاہیدن۔ محسن نقوی آکھیا جو پرامن تے محفوظ ایس سی او خطہ اساݙی مشترکہ کوششاں دا ہدف اے۔ اساں 2027ء اچ اسلام آباد اچ منعقد تھیوݨ آلی ایس سی او سمٹ اچ شرکاء دے استقبال دے منتظر ہیسے۔