ایکشن کمیٹی دی طرفوں پاکستان توں منتخب تھیوݨ آلی آزاد کشمیر اسمبلی دی 12 نشستاں ختم کرݨ دا مطالبہ انتخابی عمل کوں سبوتاژ کرݨ دے مترادف اے، خواجہ آصف

اسلام آباد۔ 5 جون (اے پی پی) وفاقی وزیردفاع خواجہ محمد آصف آکھیے جو 27 جولائی کوں آزاد کشمیر اچ انتخابات منعقد تھیسن، ایکشن کمیٹی دی طرفوں پاکستان توں منتخب تھیوݨ آلی آزاد کشمیر اسمبلی دی 12 نشستاں ختم کرݨ دا مطالبہ انتخابی عمل کوں سبوتاژ کرݨ دے مترادف اے۔ سوشل میڈیا پلیٹ فارم ایکس (ٹویٹر) تے ہک پوسٹ اچ جاری بیان اچ انھاں آکھیا جو جمہوری سوچ دا تقاضا اے جو جیڑھے لوک اے مطالبہ کریندے پئن او ایں کوں 27 جولائی کوں عوام دے سامݨے رکھن تے خلقِ خدا کوں اے فیصلہ کرݨ ݙیون تے نمائندگی دی شکل تشکیل کرݨ ݙیون، اے جمہوری سوچ ہوسی نتاں ایں کوں بلیک میلنگ تصور کیتا ویسی۔انھاں آکھیا جو سیالکوٹ شہر تے تحصیل توں کشمیر اسمبلی دی ہک سیٹ اے، تے پاکستان قومی اسمبلی دی ݙو نشستاں ہن جݙاں جو باقی پاکستان اچ کشمیر اسمبلی دے حلقے کھنڈے ہوئن ۔ اتھاں کشمیری مہاجراں دی زیادہ تعداد جموں توں اے۔ اکتوبر 1947ء اچ مہاجر ݙو لکھ توں ودھ جاناں دی قربانی ݙے تے سیالکوٹ شہر تے تحصیل اچ آوسیے۔ لکھاں عصمتاں لُٹیاں، ہزاراں دھیریں اغوا تھیاں۔ تساں کئیں طریقے نال اِنھاں مہاجراں کوں انھاں دے حق توں محروم کرسڳدو؟ خواجہ آصف آکھیا جو کئی ݙہاکیں اِنھاں مہاجراں نہایت کسمپرسی دی حالت اچ گزاری، زندگی دی بنیادی سہولتاں توں محروم رہیے۔ اِنھاں لوکاں آزادی دی ٻہوں مہانگی قیمت ݙتی اے، انھاں آکھیا جو اپݨی صلاح کوں تسلیم کراوݨ کیتے جمہوری رستہ اپناؤ۔