کے پی ٹی دی 140 ایکڑ زمین تے میری ٹائم بزنس ڈسٹرکٹ دے قیام سانڳے ایم او یو تے دستخط، پاکستان کوں علاقائی بحری تجارت تے سرمایہ کاری دا مرکز بݨاوݨ دا ہدف اے، وفاقی وزیر بحری امور

اسلام آباد۔ 6 جون (اے پی پی) وفاقی وزیر بحری امور محمد جنید انوار چوہدری آکھیے جو پاکستان سعودی تے مقامی شراکت داراں دے نال کراچی پورٹ ٹرسٹ (کے پی ٹی) دی ساحلی زمین تے عالمی معیار دے میری ٹائم بزنس ڈسٹرکٹ دی ترقی دے امکانات دا جائزہ گھنݨ کیتے مفاہمتی یادداشت (ایم او یو) تے دستخط کر ݙتن۔ ایم او یو تے دستخط سعودی پاکستان جوائنٹ بزنس کونسل (جے بی سی) دے اعلیٰ سطحی وفد دے دورۂ پاکستان دے دوران کیتے ڳئے۔ معاہدے تے کراچی پورٹ ٹرسٹ، سعودی بزنس کونسل، نجد گیٹ وے ہولڈنگ کمپنی، عارف حبیب ڈولمین ریئٹ مینجمنٹ لمیٹڈ (اے ایچ ڈی آر ایم ایل) تے پاکستان کارپوریٹ کنسورشیم وچال اتفاق تھیا۔وزیر بحری امور موجب وفاقی وزیر آکھیا جو مجوزہ منصوبہ کراچی اچ ایم ٹی خان روڈ تے واقع کراچی پورٹ ٹرسٹ دی 140 ایکڑ زمین تے تعمیر کیتا ویسی، جیں دا مقصد علاقے کوں ہک جدید تجارتی تے بحری مرکز اچ تبدیل کرݨا اے جیں دے تحت جدید تجارتی انفراسٹرکچر قائم کیتا ویسی تاں جو ملکی و غیر ملکی سرمایہ کاری کوں ودھارا ݙتا ونڄ سڳے ، روزگار دے نویں موقع پیدا تھیوݨ تے شہری ترقی دے عمل کوں ٻئی تقویت ملے۔ وفاقی وزیر محمد جنید انوار چوہدری اپݨے بیان اچ آکھیا جو اے اسٹریٹجک شراکت داری کراچی پورٹ ٹرسٹ دے ساحلی اثاثیں دی مکمل صلاحیت بروئے کار گھن آوݨ تے پاکستان کوں بحری تجارت و سرمایہ کاری دے علاقائی مرکز دے طور تے ابھارݨ دا ہک تاریخی موقع اے۔ وفاقی وزیر واضح کیتا جو منصوبے تے عملدرآمد توں پہلے پاکستانی قوانین دے تحت سارے قانونی تے ریگولیٹری تقاضے پورے کیتے ویسن۔اتھاں سعودی وفد دے ارکان بحری شعبے اچ وسیع تعاون، بندرگاہی انفراسٹرکچر دی ترقی تے متعلقہ منصوبیں اچ ممکنہ سرمایہ کاری اچ دلچسپی ڳھدی ۔ محمد جنید انوار چوہدری دا آکھݨ ہئی جو سعودی وفد دا اے دورہ ݙوہیں بھرا ملکاں وچال اقتصادی تعلقات کوں مزید تکڑا بݨاوݨ تے بندرگاہواں، لاجسٹکس، انفراسٹرکچر تے تجارتی سہولت کاری دے شعبیں اچ سرمایہ کاری دے نویں موقع ڳولݨ دی وسیع کوششاں دا حصہ اے۔ انھاں آکھیا جو متعلقہ اداریں دی منظوریاں نال مشروط اے منصوبہ خطے دے ساریں توں وݙے ساحلی تجارتی ترقیاتی منصوبیں اچ شمار تھی سڳدے۔