ملک اچ 7 توں 12 جون تئیں زور دی گرمی پووݨ دا امکان اے، محکمہ موسمیات دی وارننگ

اسلام آباد۔ 6 جون(اے پی پی) محکمہ موسمیات چتاوݨی ݙتی اے جو 7 توں 12 جون دے دوران ملک دے ٻہوں سارے علاقیں اچ زور دی گرمی پووݨ دا امکان اے ۔ محکمہ موسمیات موجب 8 جون توں اُتلی فضاواں اچ اُچے دٻاؤ دا نظام بݨݨ تے 11 جون تئیں برقرار رہݨ پاروں درجہ حرارت معمول توں ودھݨ دا امکان اے ۔محکمہ موسمیات دی طرفوں جاری کیتی ڳئی ایڈوائزری موجب کجھ علاقیں اچ درجہ حرارت 48 توں 51 ڈگری سینٹی گریڈ تئیں پُڄ سڳدے۔خیبرپختونخوا اچ 8 توں11 جون دے دوران پشاور، مردان، لکی مروت تے دیرہ اسماعیل خان اچ درجہ حرارت 41 توں 46 ڈگری سینٹی گریڈ تئیں رہݨ دی توقع اے، جݙاں جو دیر، سوات، چترال تے گلگت بلتستان اچ 37 توں 40 ڈگری سینٹی گریڈ تئیں درجہ حرارت ریکارڈ تھی سڳدے۔ وفاقی دارالحکومت اسلام آباد، راولپنڈی تے گردونواح اچ 8 توں 10 جون دے دوران درجہ حرارت معمول توں 5 توں 7 ڈگری ودھ رہݨ تے 41 توں 44 ڈگری سینٹی گریڈ تئیں پُڄݨ دا امکان اے۔ پنجاب دے میدانی علاقیں بشمول لاہور، فیصل آباد، ملتان، بہاولپور تے ٻئے اضلاع اچ 8 توں 11 جون دے دوران درجہ حرارت 44 توں 48 ڈگری سینٹی گریڈ تئیں ونڄ سڳدے۔سندھ تے بلوچستان دے کجھ اضلاع اچ صورتحال ٻئی سنگین تھی سڳدی اے، جتھاں جیکب آباد، سکھر، لاڑکانہ، تربت تے پنجگور اچ درجہ حرارت 48 توں 51 ڈگری سینٹی گریڈ تئیں پڄݨ دا ݙر اے جݙاں جو کراچی اچ 8 توں 12 جون دے دوران درجہ حرارت 40 توں 43 ڈگری سینٹی گریڈ دے درمیان رہݨ دی پیشگوئی کیتی ڳئی اے۔ محکمہ موسمیات موجب رات ویلھے وی گرمی دی شدت برقرار رہسی جیں نال حٻس تے ہیٹ اسٹریس اچ ودھارا تھی سڳدے۔ جنوبی پنجاب تے سندھ دے کجھ علاقیں اچ مٹی آلی دھوڑ دی اندھاری گُھلسی۔ محکمہ موسمیات عوام، خصوصاً ٻالاں، عورتاں تے وݙے بزرگ شہریاں کوں احتیاط ورتݨ دی ہدایت کریندے آکھیے جو سویلے 10 وڄے توں شام 4 وڄے تئیں غیر ضروری طور تے دُھپ اچ نکلݨ توں پرہیز کرو، پاݨی دا زیادہ استعمال کرو تے جسم کوں ہائیڈریٹ رکھو۔ کساناں کوں فصلاں تے مال ڈھور کوں زور دی گرمی دے اثرات توں محفوظ رکھݨ کیتے ضروری اقدامات کرݨ دا مشورہ وی ݙتا ڳئے۔