کیمیکل صنعت پاکستان دی معاشی ترقی و برآمدات اچ کلیدی کردار ادا کر سڳدی اے، پروفیسر احسن اقبال

لاہور۔ 6 جون (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو کیمیکل دی صنعت پاکستان دی اقتصادی ترقی، برآمدات دے ودھارے، صنعتی جدت تے روزگار دے موقع پیدا کرݨ اچ مرکزی کردار ادا کرسڳدی اے، پاکستان کوں علم، تحقیق، ٹیکنالوجی تے صنعت تے مبنی ترقیاتی ماڈل اختیار کرݨا پوسی تاں جو ملک کوں ہک مضبوط تے برآمدات تے مبنی معیشت اچ تبدیل کیتا ونڄ سڳے۔ اے ڳالھ انہاں اتھاں ایکسپو سینٹر اچ پاکستان کیمیکل ایکسپو 2026ء توں بطور مہمانِ خصوصی خطاب کریندے آکھی۔وفاقی وزیر آکھیا جو کیمیکل انڈسٹری کوں دنیا اچ ’’ساریاں صنعتاں دی ماء‘‘ آکھیا ویندے کیوں جو زراعت، ٹیکسٹائل، دوائیں، تعمیرات، آٹوموبائل، الیکٹرانکس تے توانائی سودھے تقریباً ہر شعبے دی بنیاد کیمیکل صنعت تے استوار اے۔ انھاں آکھیا جو جے فولاد صنعتی ترقی دا ڈھانچہ اے تاں کیمیکل صنعت ایں دے جسم اچ بھڄݨ آلا خون اے۔ احسن اقبال آکھیا جو عالمی کیمیکل صنعت دا حجم چھی ٹریلین ڈالر توں ودھ چکئے، چین، جرمنی، جنوبی کوریا، سنگاپور، ملائیشیا تے ویتنام جیھے ملکاں اپݨی صنعتی ترقی دی بنیاد مضبوط کیمیکل تے پیٹروکیمیکل شعبیں تے رکھی۔ انھاں آکھیا جو پاکستان کوں وی ایں رستے تے چلدے تحقیق، جدت، ہنرمند افرادی قوت تے جدید صنعتی ڈھانچے اچ سرمایہ کاری کرݨی پوسی۔انھاں آکھیا جو پاکستان ہر سال ارباں ڈالر مالیت دے کیمیکلز، پولیمرز تے صنعتی خام مال درآمد کریندے جݙاں جو اِنھاں اچوں ٻہوں وݙی تعداد مقامی سطح تے تیار کیتی ونڄ سڳدی اے۔ انھاں آکھیا جو ہر درآمد شدہ کیمیکل دے پچھوں ہک فیکٹری، ہک سرمایہ کاری، ہک روزگار تے ہک برآمدی موقع لکیا ہویا اے۔ وفاقی وزیر آکھیا جو ’’اڑان پاکستان‘‘ پروگرام دے تحت برآمدات، ڈیجیٹل معیشت، ماحولیات، توانائی تے سماجی بااختیاری دے اہداف دے حصول اچ کیمیکل صنعت اہم کردار ادا کر سڳدی اے۔ انھاں ایں گالھ تے زور ݙتا جے پاکستان کوں 2035ء تئیں 100 ارب ڈالر برآمدات دے ہدف تئیں پڄݨا اے تاں خام مال دے بجائے ویلیو ایڈڈ مصنوعات دی برآمدات کوں ودھارا ݙیوݨا پوسی۔انھاں آکھیا جو مصنوعی ذہانت (اے آئی)، روبوٹکس، آٹومیشن تے ڈیجیٹل ٹیکنالوجیز جدید صنعتی ترقی دا لازمی حصہ بݨ چکئن، ایں کیتے پاکستانی صنعت کوں چوتھے صنعتی انقلاب دے تقاضیں موجب اپݨے آپ کوں ڈھالݨا پوسی۔ انھاں گرین کیمسٹری، ری سائیکلنگ، بائیو بیسڈ مٹیریلز تے ماحول دوست صنعتی طریقیں کوں مستقبل دی معیشت کیتے ناگزیر قرار ݙتا۔ احسن اقبال پیٹروکیمیکل صنعت، اسپیشلٹی کیمیکلز، فارماسیوٹیکل اجزاء، ایگروکیمیکلز، معدنی پروسیسنگ تے گرین مٹیریلز کوں پاکستان کیتے غیر معمولی موقع قرار ݙیندے آکھیا جو بدلدی عالمی سپلائی چینز پاکستان کوں صنعتی ترقی دا تاریخی موقع ݙیندیاں پئن۔انھاں ایں موقع تے قومی اعتماد تے پاکستانیت دے ودھارے دی اہمیت تے وی زور ݙتا تے آکھیا جو اڄ دی دنیا اچ جنگاں صرف سرحداں تے نی بلکہ بیانیاں، اطلاعات تے ذہناں دے میدان اچ وی لڑیاں ویندن۔ انھاں آکھیا جو دشمن قوماں دے اعتماد تے امید کوں کمزورکرݨ دی کوشش کریندے، ایں کیتے پاکستانیاں کوں اپݨی صلاحیتاں، کامیابیاں تے اپݨے روشن مستقبل تے یقین رکھݨا پوسی۔ احسن اقبال آکھیا جو پاکستانیت ہک جذبہ، مشترکہ خواب تے اجتماعی ذمہ داری دا ناں اے۔ انھاں عوام تے زور ݙتا جو او مایوسی دے بیانیے کوں مسترد کرن، امید و اعتماد کوں ودھارا ݙیون تے پاکستان کوں ترقی، تحقیق، صنعت و خوشحالی دی نویں منزلاں تئیں پڄاوݨ کیتے اپݨا بھرپور کردار ادا کرن۔