دنیا اچ سالانہ 690 بلین ڈالر دی 1.3 ارب ٹن خوراک ضائع تھی ویندی اے، ورلڈ فوڈ آرگنائزیشن

اسلام آباد۔ 7 جون (اے پی پی) ورلڈ فوڈ آرگنائزیشن (ڈبلیو ایف او) آکھیے جو دنیا اچ ہر سال تقریباً 690 ارب ڈالر مالیت دی 1.3 ارب ٹن خوراک ضائع تھی ویندی اے۔ ڈبلیو ایف او موجب دنیا اچ ہک ارب انسان بُھک دا شکار ہن جݙاں جو اقوامِ متحدہ دی رپورٹ اچ آکھیا ڳئے جو ترقی پذیر ملکاں اچ تقریباً 11 فیصد آبادی کوں رات دا کھاݨا نصیب نی تھیندا، عالمی سطح تے غذائی عدم تحفظ اچ مسلسل ودھارا تھیندا پئے۔ اقوامِ متحدہ دے ورلڈ فوڈ پروگرام ایں خدشے دا اظہار کیتے جو خوراک دی عدم دستیابی اچ خطرناک حد تئیں ودھارا تھیندا پئے جݙاں جو 40 توں ودھ ملک قحط دی دہلیز تے ہن، آپت دے جھیڑے، جنگاں، ماحولیاتی تبدیلیاں تے وبائیں جیھے بحران بُھک دے شکار لوکاں دی تعداد اچ تکھے ودھارا کریندے پئن ۔واضح رہے جو ہک صحت مند بندہ پھل تے سبزیاں دے علاوہ ماہانہ تقریباً 70 کلوگرام اناج استعمال کریندے۔ گھٹ خوراکی یا غذا دی عدم دستیابی پاروں ترقی پذیر ملکاں اچ تقریباً 11 فیصد آبادی کوں رات دا کھاݨا نصیب نی تھیندا جݙاں جو خوراک دی کمی پاروں چھوٹے ٻال تے کھیر پلواوݨ آلیاں ماواں زیادہ متاثر تھیندن۔ عالمی ادارۂ صحت موجب ہر سال پنج سال توں گھٹ عمر دے ساڈھے چوݙاں ہزار ٻال بُھک پاروں زندگی دی بازی ہر ویندن۔ عالمی اداریں آکھیے جو دنیا اچ سالانہ تقریباً 1.3 ارب ٹن خوراک ضائع تھیندی اے جیں دی لاڳت 690 ارب ڈالر نیڑے اے، ایں کوں ضائع کرݨ آلے ملکاں اچ امیر تے غریب ݙوہیں ملک شامل ہن۔ انھاں دا آکھݨ اے جو خوراک دے ضیان تے کنٹرول، جامع زرعی پالیسی، خوراک دی برآمدات دے بجائے ایں دے ذخیرے تے توجہ ݙتی ونڄے تاں غذائی عدم تحفظ دے خدشات کوں گھٹ کیتا ونڄ سڳدے۔گلوبل فوڈ سکیورٹی دی رپورٹ موجب گزریل سال 2025ء اچ 47 مختلف خطیں دے گھٹ توں گھٹ 266 ملین لوک غذائی عدم تحفظ دا شکار تھئن جیڑھے انھاں ملکاں دی مجموعی آبادی دا 22.9 فیصد ہن۔ رپورٹ اچ آکھیا ڳئے جو غذائی بحران دے ترائے وݙے عوامل پاروں لوک بھک دے مسئلیں دا سامݨا کریندے پئن ، جنگاں تے جھیڑیں پاروں انھاں ملکاں دی 55.7 فیصد آبادی متاثر تھئی، موسمیاتی تبدیلیاں دے نتیجے اچ 33.1 فیصد تے معاشی بحران پاروں 11.3 فیصد لوک متاثر تھئن۔