پنجاب اچ ہیٹ ویوالرٹ جاری، درجہ حرارت معمول توں 5 توں 7 ڈگری سینٹی گریڈ زیادہ رہݨ دا امکان

لاہور۔ 7 جون (اے پی پی) پراونشنل ڈیزاسٹر مینجمنٹ اتھارٹی پنجاب آندے ہفتے کیتے ہیٹ ویو الرٹ جاری کرݙتے، زیادہ تر اضلاع اچ درجہ حرارت معمول توں 5 توں 7 ڈگری سینٹی گریڈ زیادہ رہݨ دا امکان اے۔ ترجمان پی ڈی ایم اے موجب 8 توں 12 جون تئیں پنجاب دے زیادہ تراضلاع اچ زور دی گرمی پووݨ دا امکان اے ، اُتلے پنجاب اچ درجہ حرارت 41 توں 44 ڈگری تئیں جݙاں جو جنوبی پنجاب و میدانی اضلاع اچ درجہ حرارت 44 توں 48 ڈگری سینٹی گریڈ تئیں ونڄݨ دا امکان اے۔پی ڈی ایم اے پنجاب مزید آکھیا جو راولپنڈی، اٹک، چکوال، جہلم، لاہور، گجرات، گوجرانوالہ، حافظ آباد، منڈی بہاؤالدین، سیالکوٹ، نارووال، اوکاڑہ، قصورتے فیصل آباد، دیرہ غازی خان، ملتان، خانیوال، پاکپتن، رحیم یارخان، راجن پور، بہاولپور، بہاولنگر، بھکر، لیہ، کوٹ ادو، سرگودھا، جھنگ، خوشاب، میانوالی، نور پور تھل تے ساہیوال اچ وی درجہ حرارت اچ ودھارا متوقع اے۔ ریلیف کمشنر پنجاب نبیل جاوید کمشنرز و ڈی سیز کوں الرٹ رہݨ دی ہدایت کیتی اے۔ ریلیف کمشنر آکھیا جو وزیراعلیٰ پنجاب دی ہدایات تے انتظامیہ الرٹ رہے۔ڈی جی پی ڈی ایم اے عمر جاوید آکھیا جو رات ویلھے وی موسم معمول توں زیادہ تَتا رہݨ دی توقع اے، گرمی دی شدت پاروں مٹی دھوڑ آلی اندھاری دا خطرہ موجود اے، شہری سویلے 10 وڄے توں شام 4 وڄے تئیں براہِ راست دُھپ توں بچݨ تے زیادہ پاݨی پیون۔ انھاں آکھیا جو کاشتکار فصلاں تے جانوراں دے تحفظ کیتے پہلے توں اقدامات کرن، ریسکیو 1122 ہیٹ اسٹروک تے پاݨی دی کمی توں متاثرہ لوکاں دی مدد کیتے الرٹ رہوے۔