معیاری غذا ہر شہری دا بنیادی حق تے صحت مند قوم دی ضمانت اے، وزیراعلیٰ سندھ

کراچی۔ 07 جون (اے پی پی) وزیراعلی سندھ سید مراد علی شاہ آکھیے جو محفوظ غذا ہر انسان دا بنیادی حق تے صحت مند قوم دی ضمانت اے۔ اتوار کوں عالمی یومِ غذائی تحفظ دے موقع تے وزیراعلیٰ ہاؤس توں جاری پیغام اچ انھاں آکھیا جو غذائی تحفظ انسانی صحت، مضبوط معیشت تے پائیدار ترقی کیتے ٻہوں اہمیت رکھیندے، غیر معیاری تے آلودہ خوراک کئی خطرناک بیماریاں دا سبب بݨدی اے۔وزیراعلیٰ آکھیا جو حکومتِ سندھ عوام کوں محفوظ، معیاری تے صحت بخش خوراک ݙیوݨ کیتے مؤثر اقدامات کریندی پئی اے، خوراک دی تیاری توں استعمال تئیں ہر مرحلے تے احتیاط، صفائی تے معیار یقینی بݨاوݨ ضروری اے۔ انھاں آکھیا جو غذائی تحفظ صرف حکومت دی ذمہ واری نی بلکہ پوری سوسائٹی دی سانجھی ذمہ واری اے۔ انھاں آکھیا جو خوراک دے معیار کوں بہتر بݨاوݨ کیتے مؤثر نگرانی تے فوڈ سیفٹی قوانین تے عملدرآمد جاری اے تاں جو عوام کوں محفوظ خوراک ݙیوݨ یقینی بݨائی ونڄ سڳے۔ انھاں عوام تے زور ݙتا جو او صاف پاݨی، حفظانِ صحت تے محفوظ خوراک دے اصولاں تے عمل کرن۔ وزیراعلیٰ آکھیا جو عالمی یومِ غذائی تحفظ اساکوں صحت مند تے محفوظ مستقبل کیتے اجتماعی کردار ادا کرݨ دا پیغام ݙیندے۔ انھاں آکھیا جو ٻالاں، تریمتاں تے کمزور طبقیں کوں محفوظ خوراک ݙیوݨ حکومتِ سندھ دی اولین ترجیح اے کیوں جو محفوظ غذا ہی صحت مند قوم تے تکڑی معیشت دی بنیاد اے۔