پاک بحریہ سمندری ماحولیاتی نظام دے تحفظ کیتے سرگرمِ عمل اے، ایڈمرل نوید اشرف

اسلام آباد۔ 7 جون (اے پی پی) چیف آف دی نیول اسٹاف (سی این ایس) ایڈمرل نوید اشرف نشانِ امتیاز، نشانِ امتیاز (ملٹری)، تمغہء بسالت آکھیے جو پاکستان دی بحری سرحداں دے محافظ دی حیثیت نال پاک بحریہ بحری ماحولیاتی نظام دے تحفظ تے سمندری وسائل دے پائیدار استعمال کوں ودھاراݙیوݨ کیتے سرگرمِ عمل اے۔ ڈائریکٹوریٹ جنرل پبلک ریلیشنز (پاک بحریہ) دی طرفوں عالمی یومِ سمندر 2026ء دے موقع تے جاری بیان اچ سی این ایس آکھیا جو پاک بحریہ بحری ماحول دے تحفظ تے بحری وسائل دے پائیدار استعمال دے عالمی یومِ سمندر دے مجموعی مقصد اچ اپݨا حصہ پاوݨ دے اپݨے عزم تے قائم اے۔بیان اچ آکھیا ڳئے جو پاک بحریہ سمندری آلودگی کوں گھٹ کرݨ تے بحیرہء عرب دی صحت اچ کردار ادا کرݨ کیتے، ساحلی تے سمندری صفائی دی باقاعدہ مہماں، آگاہی مہماں تے ماحولیاتی پروگراماں دے ذریعے اقدامات کوں یقینی بݨیندی پئی اے۔ انھاں آکھیا جو اساݙے سمندراں دا تحفظ سانجھی ذمہ واری تے قومی ترجیح اے، اساکوں ایں ڳالھ کوں یقینی بݨاوݨ کیتے مستعدی تے دور اندیشی دے نال کم کرݨا چاہیدے جو موجودہ تے آوݨ آلیاں نسلاں صحت مند، لچکدار تے پیداواری سیارے دیاں وارث ہوون، میں سارے اسٹیک ہولڈرز توں ایں مقصد کیتے اپݨی وابستگی دا اعادہ کرݨ دا مطالبہ کرینداں۔ آؤ اساں موجودہ اقدامات دا جائزہ گھنوں، بین الاضلاعی تعاون کوں ودھاؤں تے اِنھاں اقدامات تے عملدرآمد کوں تکھا کروں جنھاں توں اساں اپݨی سالمیت تے مثبت ماحول کوں محفوظ بݨاوݨ کیتے قابلِ قدر مصنوعات بݨا سڳدوں۔انھاں آکھیا جو سمندراں دا عالمی ݙینھ ہر سال 8 جون کوں سمندراں دی اہمیت کوں تسلیم کرݨ تے سمندری ماحول دے تحفظ دے حوالے نال اساݙی مشترکہ ذمہ واری دا اعادہ کرݨ کیتے منایا ویندے۔ عالمی یومِ سمندر 2026ء دا موضوع ’’اساݙے نیلے سیارے کیتے مضبوط میرین پروٹیکٹڈ ایریاز‘‘ منتخب کیتا ڳئے جیڑھا سمندری ماحولیاتی نظام دے تحفظ تے اساݙے سمندراں دے پائیدار مستقبل کوں یقینی بݨاوݨ کیتے تحفظ دی کوششاں کوں تکڑا بݨاوݨ دی لوڑھ تے زور ݙیندے۔ سمندر زمین دی سطح دے 70 فیصد توں زیادہ حصے تے مشتمل ہن تے آب و ہوا کوں منظم کرݨ، حیاتیاتی تنوع کوں سہارا ݙیوݨ، عالمی تجارت کوں سوکھا بݨاوݨ تے دنیا اچ لکھاں لوکاں دی روزی روٹی برقراررکھݨ اچ اہم کردار ادا کریندن۔ سمندر خوراک، توانائی تے معاشی خوشحالی دا ذریعہ وی ہن، تاں جو سمندری آلودگی، لوڑھ توں زیادہ ماہی گیری، سمندری رہائش گاہواں دی تباہی تے موسمیاتی تبدیلی توں ودھدے خطرات اساݙے سمندراں دی صحت تے پائیداری کوں خطرے اچ سٹیندے پئن۔ایڈمرل نوید اشرف آکھیا جو میرین پروٹیکٹڈ ایریاز (MPAs) سمندر دے مخصوص علاقے ہن جتھاں قدرتی وسائل دے تحفظ کیتے انسانی سرگرمیاں دا احتیاط نال انتظام کیتا ویندے، اے سمندری حیاتیاتی تنوع دے تحفظ تے نازک ماحولیاتی نظام جیویں مرجان دیاں چٹاناں، مینگرووز، مچھیاں دی آبادی، خطرے اچ پتھی سمندری انواع تے ساحلی رہائش گاہواں دی حفاظت کیتے اہم آلات دے طور تے کم کریندن۔ میرین پروٹیکٹڈ ایریاز دا مضبوط تے موثر انتظام ماحولیاتی لچک کوں ودھیندے، پائیدار ماہی گیری دی حمایت کریندے تے موسمیاتی تبدیلی دے منفی اثرات کوں گھٹ کرݨ اچ مدد ݙیندے۔ اڄوکے سال دا تھیم ملکاں کوں صحت مند تے زیادہ پائیدار سمندری ماحول کیتے اِنھاں MPAs کوں ودھاوݨ تے تکڑا بݨاوݨ دی ترغیب ݙیندے۔ انھاں آکھیا جو سمندراں دا عالمی ݙینھ لوکاں تے کمیونٹیز کوں سمندری حیات دے تحفظ دے حوالے نال انھاں دیاں ذمہ واریاں دی یاد ݙویندے۔ پلاسٹک دے فضلے کوں گھٹ کرݨا، آبی آلودگی کوں روکݨا، ماہی گیری دے پائیدار طریقیں دی حمایت کرݨا تے ساحلی صفائی دی سرگرمیاں اچ حصہ گھنݨا اہم طریقے ہن جنھاں اچ لوک اپݨا حصہ پا سڳدن۔ ماحولیاتی تنظیماں، بحری اداریں تے بین متعلقہ اسٹیک ہولڈرز کوں بیداری پیدا کرݨ کیتے رل تے کم کرݨا چاہیدے جیڑھا سمندر دے تحفظ تے سمندری وسائل دے ذمہ دارانہ استعمال کوں ودھارا ݙیندے۔