چین دے نال نویں تجارتی و سرمایہ کاری معاہدے پاکستان دی معاشی تقدیر بدل سڳدن، قیصر احمد شیخ

فیصل آباد/چنیوٹ۔ 07 جون (اے پی پی) وفاقی وزیر سرمایہ کاری بورڈ قیصر احمد شیخ آکھیے جو پاکستان تے چین وچال اقتصادی، تجارتی تے سرمایہ کاری تعلقات ہک نویں دور اچ داخل تھیندے پئن تے اڄوکے اعلیٰ سطحی کاروباری رابطیں دے نتیجے اچ طے پاوݨ آلے ٻہوں سارے معاہدے، مفاہمتی یادداشتاں تے سانجھے منصوبے نہ صرف ملکی معیشت، صنعت، زراعت تے ٹیکنالوجی دے شعبیں اچ انقلابی تبدیلیاں تے نویں پیشرفت دی بنیاد بݨیسن بلکہ پاکستان کوں خطے اچ سرمایہ کاری دے ہک مضبوط مرکز دے طور تے ابھارݨ اچ وی اہم کردار ادا کریسن، وزیرِاعظم دی خصوصی ہدایات تے حکومتی معاشی وژن دے تحت چین دے نال تعاون دے نویں رستے کھلدے پئن جنھاں دے ثمرات آوݨ آلے سالاݨ اچ قومی معیشت تے واضح طور تے مرتب تھیسن۔او انجمن اسلامیہ چنیوٹ دے تعاون نال منعقدہ فری میڈیکل کیمپ دے دورے دے موقع تے میڈیا نمائندیں نال ڳالھ کریندے پئے ہن ۔وفاقی وزیرکیمپ دے مختلف شعبیں دا دورہ کیتا، مریضاں دی عیادت کیتی تے انھاں کوں ݙتیاں ونڄݨ آلیاں طبی سہولتاں دا جائزہ گھدا۔انھاں آکھیا جو بورڈ آف انویسٹمنٹ تے اسپیشل انویسٹمنٹ فیسلیٹیشن کونسل (ایس آئی ایف سی) دی سانجھ نال چین اچ پاکستانی تے چینی سرمایہ کاراں تے کاروباری شخصیات وچال بی ٹو بی (Business to Business) ملاقاتاں دا انعقاد کیتا ڳئے جنھاں دے مثبت نتیجے برآمد تھئن۔انھاں آکھیا جو وزیرِاعظم شہباز شریف واضح ہدایات ݙتن چین دی جدید زرعی ٹیکنالوجی، سمارٹ فارمنگ سسٹمز، صنعتی آٹومیشن، مصنوعی ذہانت تے مبنی پیداواری نظام تے جدید مشینری دا عملی جائزہ ڳھدا ونڄے تاںجو انھاں تجربیں تے ٹیکنالوجیز کوں پاکستان اچ متعارف کراوݨ دے امکانات کوں حقیقت دا روپ ݙتا ونڄ سڳے۔ قیصراحمد شیخ آکھیا جو چین دے مختلف شہراں اچ پاکستانی تے چینی کاروباری شخصیات وچال تھیوݨ آلیاں ملاقاتاں کامیاب رہیاں تے انھاں دے نتیجے اچ ٻہوں ساری مفاہمتی یادداشتاں تے دستخط کیتے ڳئن جݙاں جو کئی سانجھے منصوبیں تے عملی پیشرفت کیتے وی اتفاقِ رائے پیدا تھیا۔ انھاں آکھیا جو مختلف شعبیں اچ سرمایہ کاری، صنعتی تعاون، ٹیکنالوجی ٹرانسفر، زرعی ترقی، قابلِ تجدید توانائی تے مینوفیکچرنگ دے میداناں اچ سانجھ دے وسیع امکانات سامݨے آئن۔ وفاقی وزیرآکھیا جو پاکستان تے چین دی دوستی محض سفارتی تعلقات تئیں محدود نی بلکہ اے اعتماد، سانجھے احترام، مشترکہ ترقی تے پراݨے تعاون تے مبنی ہک مثالی شراکت داری اے۔ انھاں آکھیا جو ݙوہیں ملکاں وچال 75 سال توں ودھ عرصے تے محیط سفارتی تعلقات ہر گزردے سال دے نال مزید تکڑے تھیندے پئن تے چین پاکستان اقتصادی راہداری (سی پیک) ایں دوستی دی روشن ترین مثال اے۔ حکومت دی معاشی پالیسیاں دا ذکر کریندے قیصر احمد شیخ آکھیا جو وزیراعظم دی قیادت اچ حکومت معیشت دی بحالی، سرمایہ کاری دے ودھارے، کاروباری ماحول دی بہتری تے عوامی فلاح کیتے مسلسل اقدامات کریندی پئی اے۔ فری میڈیکل کیمپ دے حوالے نال وفاقی وزیر قیصراحمد شیخ آکھیا جو دیہاتی تے پسماندہ علاقیں اچ صحت دی بنیادی سہولتاں دی کمی ہک وݙا چیلنج اے تے ایں ضرورت کوں سامݨے رکھیندے ہوئیں انجمن اسلامیہ چنیوٹ دے تعاون نال مختلف علاقیں اچ مفت طبی کیمپاں دا انعقاد کیتا ویندا پئے۔ وفاقی وزیرݙسایا جو چنیوٹ دے معروف ماہر ڈاکٹراں رضاکارانہ طور تے خدمات انجام ݙتیاں جݙاں جو تقریباً پنج توں چھی سو مریضاں ایں میڈیکل کیمپ توں فیدہ چاتے تے انھاں کوں مفت طبی سہولتاں ݙتیاں ڳیاں۔ انھاں منتظمین، ڈاکٹرز، پیرامیڈیکل اسٹاف تے رضاکاراں دی دی تعریف کریندے آکھیے معاشرے دے کمزور تے محروم طبقیں دی خدمت ہک عظیم انسانی فریضہ اے تے ایہو جیھے اقدامات معاشرتی یکجہتی، ہمدردی تے اجتماعی ذمہ واری دے ودھارے اچ اہم کردار ادا کریندن۔