مشرقِ وسطیٰ اچ حالیہ تشدد سنگین خطرہ اے، فریقین تحمل تے بردباری تے امن کوں ٻیا ہک موقع ݙیون، وزیراعظم محمد شہباز شریف دی تشدد تے تباہی دے راہ دی بجائے امن تے سفارتکاری دے راہ تے قائم رہݨ دی اپیل

اسلام آباد۔ 8 جون (اے پی پی) وزیراعظم محمد شہباز شریف مشرقِ وسطیٰ اچ حالیہ تشدد کوں سنگین خطرہ قرار ݙیندیں ہوئیں فریقین توں تحمل تے بردباری، امن کوں ٻیا ہک موقع ݙیوݨ تے تشدد تے تباہی دے راہ دی بجائے امن تے سفارتکاری دے راہ تے قائم رہݨ دی اپیل کیتی اے۔ سنوار کوں وزیراعظم محمد شہباز شریف “ایکس” تے آپݨے سنیھے اچ آکھیے جو مشرقِ وسطیٰ اچ حالیہ تشدد اچ اضافہ ایں ڳالھ دی واضح یاد دِہانی اے جو ہک کمزور تے غیر مستحکم جنگ بندی کتنے سنگین خطریاں تے ناقابلِ برداشت نتائج دا باعث ٻݨ سڳدی اے۔ وزیراعظم آکھیے جو اساں آپݨے برادر ملکاں تے شراکت داراں دے نال رل تے ایں تنازعے دے پرامن سفارتی حل کیتے خلوصِ نیت تے انتھک کوششاں کریندے پئیوں۔ انھاں آکھیے جو خاص طور تے ایجھے ویلھے اچ جݙاں ہک منصفانہ تے پائیدار حل دا مقصد نیڑے ݙسدا پئے، اساں سارے فریقاں توں پرزور اپیل کریندوں جو او تحمل تے بردباری دا مظاہرہ کرن اتے امن کوں ٻیا ہک موقع ݙیون۔ انھاں آکھیے جو اساکوں تشدد تے تباہی دے راہ دی بجائے امن تے سفارتکاری دی ایں راہ تے قائم رہݨا ہوسی جئیں دی کامیابی دے امکانات روشن تے حوصلہ افزا ہن۔