وزیراعظم دی زرعی اصلاحات دے حکومتی ایجنڈے کوں اڳو ودھاوݨ کیتے ماہرین تے متعلقہ سٹیک ہولڈرز تے مشتمل کمیٹی بݨاوݨ دی ہدایت، معیشت کوں بحال کرݨ اچ زرعی شعبہ انقلابی تبدیلی گھن آوݨ دی بھرپور صلاحیت رکھیندے، شہباز شریف

اسلام آباد۔ 9 جون (اے پی پی) وزیراعظم محمد شہباز شریف معیشت دی بحالی اچ زرعی شعبے دی اہمیت کوں اڳو گھن آتے زرعی اصلاحات دے حکومتی ایجنڈے کوں اڳو ودھاوݨ کیتے ملک بھر توں ماہرین تے متعلقہ سٹیک ہولڈرز تے مشتمل کمیٹی بݨاوݨ دی ہدایت کیتی اے۔ وزیراعظم آفس دے میڈیا ونگ توں جاری تھیوݨ آلے بیان دے مطابق وزیراعظم محمد شہباز شریف نال زرعی شعبے دے سٹیک ہولڈرز دے وفد منگل کوں اتھاں ملاقات کیتی۔ وفد اچ کسان تنظیماں، ڈیری تے لائیو سٹاک، ویلیو ایڈڈ سیکٹر، ٻیج بݨاوݨ آلیاں کمپنیاں تے قومی تے ملٹی نیشنل اداریاں دے نمائندے شامل ہن۔ مالی سال 27-2026 دے وفاقی بجٹ توں پہلے ایں ملاقات دا مقصد بجٹ دے حوالے توں زرعی شعبے دے سٹیک ہولڈرز توں مشاورت ہئی۔ بیان دے مطابق شرکاء موجودہ علاقائی صورتحال اچ امن دے قیام کیتے وزیراعظم دی قیادت اچ امن کوششاں کوں سراہیا۔ شرکاء حالیہ متعارف کرائی ڳئی سیڈ پالیسی تے زرعی اصلاحات دا خیرمقدم کیتا اتے ایں کوں زرعی شعبے کیتے گیم چینجر قرار ݙتا۔ وزیراعظم وفد نال ڳالھ مہاڑ کریندیں ہوئیں آکھیے جو پاکستان دی معیشت کوں بحال کرݨ اچ زرعی شعبہ انقلابی تبدیلی گھن آوݨ دی بھرپور صلاحیت رکھیندے۔ انھاں آکھیے جو چین دی اکیڈمی آف ایگریکلچرل سائنسز دے تعاون نال پی اے آر سی کوں زرعی تحقیق اچ تیزی گھن آوݨ کیتے جدید خطوط تے استوار کیتا ویندا پئے ۔ وزیراعظم زرعی شعبے دی پائیدار ترقی تے زرعی اصلاحات دے ایجنڈے کوں اڳو ودھاوݨ کیتے ملک بھر توں ماہرین تے متعلقہ سٹیک ہولڈرز تے مشتمل کمیٹی بݨاوݨ دی ہدایت کیتی۔ انھاں آکھیے جو وفاق تے صوبیاں وچال مؤثر روابط تے وفاقی تے صوبائی پالیسیاں تے ضوابط اچ ہم آہنگی یقینی بݨائی ونڄے۔ وزیراعظم فی ایکڑ پیداوار ودھاوݨ، موسمیاتی تبدیلیاں نال ہم آہنگ ہائبرڈ ٻیجاں دے فروغ، باغبانی دی ترقی، زرعی میکانائزیشن تے ویلیو ایڈیشن تے خصوصی توجہ مرکوز کرݨ دی ہدایت کیتی۔ انھاں ہدایت کیتی جو کپاہ دی پیداوار اچ اضافے کیتے صوبے بالخصوص بلوچستان جامع منصوبہ پیش کرن، ازسرِ نو بݨائے ڳئے کاٹن بورڈ دا فوری نوٹیفکیشن جاری کیتا ونڄے۔ وزیراعظم شرکاء توں ڈیری تے لائیو سٹاک دے فروغ کیتے پیش کیتیاں ڳئی تجاویز دا خیرمقدم کریندیں ہوئیں آکھیے جو حکومت زرعی شعبے دی پائیدار ترقی، غذائی تحفظ تے قومی معیشت دے استحکام کیتے سارے متعلقہ فریقین دے نال مشاورت تے تعاون دا سلسلہ جاری رکھیسی۔ وفد کوں حکومت دی طرفوں زرعی شعبے دی ترقی تے کساناں دی فلاح و بہبود دے حوالے توں اقدامات تے بریفنگ ݙتی ڳئی جئیں اچ ݙسایا ڳیا جو زرخیزی سکیم دے تحت چھوٹے کساناں کوں بینکاں ولوں 1 ملین روپے تئیں دے آسان شرائط تے قرضے فراہم کیتے ویندے پئن۔ کساناں کوں سٹیٹ بینک آف پاکستان ولوں رسک کوریج سکیم تے کراپ لاس انشورنس فراہم کیتی ویندی پئی اے۔ بریفنگ دے مطابق ڈیری تے لائیو سٹاک دی ترقی کیتے نیشنل اینیمل ہیلتھ ایکٹ تے نیشنل بریڈنگ پالیسی دے مسودے تیار کر گھدے ڳئن۔ وفد اچ ارشد اقبال، ذیشان بیگ، محمود نواز شاہ، عماد ملک، رانا نسیم، احسن مصطفیٰ باجوہ، جہانگیر ترین، فہد پٹیل، شہزاد امین، خضر عالم خان، آمنہ آصف باجوہ، ظہور حسین، عثمان ظہیر، احمد قادر، آفاق ٹوانہ، شوکت رسول تے خالد کھوکھر شامل ہن۔ ملاقات اچ وفاقی وزیرِ قومی غذائی تحفظ و تحقیق رانا تنویر حسین، وفاقی وزیرِ منصوبہ بندی احسن اقبال، وفاقی وزیرِ موسمیاتی تبدیلی مصدق ملک، وفاقی وزیرِ اطلاعات و نشریات عطاء اللہ تارڑ، وفاقی وزیرِ پاور ڈویژن سردار اویس لغاری، وفاقی وزیرِ سائنس و ٹیکنالوجی خالد مگسی، وزیرِ پٹرولیم علی پرویز ملک، وفاقی وزیرِ آبی وسائل محمد معین وٹو، وزیرِ مملکت برائے خزانہ و ریلوے بلال اظہر کیانی، معاونِ خصوصی ہارون اختر تے متعلقہ اعلیٰ سرکاری افسران وی موجود ہن۔