حکومت معیشت کوں مستحکم تے پائیدار ترقی دے رستے تے ٹورݨ سانڳے اصلاحات دے ایجنڈے تے بھرپور عملدرآمد جاری رکھیا ہویا اے، وزیراعظم شہباز شریف دی عالمی بینک دے وفد نال ڳالھ مہاڑ

اسلام آباد۔31جولائی (اے پی پی) وزیراعظم محمد شہباز شریف عالمی بینک دی پاکستان دے ترقیاتی سفر اچ مسلسل معاونت دی تعریف کریندے آکھیا جو حکومت معیشت کوں مستحکم تے پائیدار ترقی دے رستے تے ٹورݨ کیتے اصلاحات دے ایجنڈے تے بھرپور عملدرآمد جاری رکھیا ہویا اے۔ اے ڳالھ انہاں عالمی بینک دی کنٹری ڈائریکٹر بولورما امگآبزر دی قیادت اچ وفد کوں آکھی جنہاں اتھاں انہاں دے نال ملاقات کیتی ۔وفد دا خیرمقدم کریندیں وزیراعظم محمد شہباز شریف عالمی بینک دے نال پاکستان دی پراݨی شراکت داری دی تعریف کیتی تے پاکستان دی سماجی و معاشی ترقی اچ ادارے دے کردار دی تعریف کیتی۔ وزیراعظم عالمی بینک دی پاکستان دے ترقیاتی سفر اچ مسلسل معاونت تے شکریہ ادا کیتا۔وزیراعظم آکھیا جو حکومت معیشت کوں مستحکم تے پائیدار ترقی دے رستے تے ٹورݨ کیتے اصلاحات دے ایجنڈے تے بھرپور عملدرآمد جاری رکھیا ہویا اے۔انھاں آکھیا جو پاکستان دا آئینی وفاقی ڈھانچہ، صوبائی خودمختاری تے وفاق تے صوبیں وچال سانجھے تعاون و مشاورت ملک دی ترقی تے استحکام کیتے بنیادی اہمیت رکھیندن۔ورلڈ بینک دی کنٹری ڈائریکٹر ’’پاکستان اچ مالیاتی وفاقیت کوں تکڑابݨاوݨ‘‘ دے حوالے نال رپورٹ پیش کیتی تے مندرجات تے بریفنگ ݙتی۔ ورلڈ بینک دے وفد اپݨی رپورٹ دے اہم نکات پیش کریندیں پاکستان اچ اٹھارویں آئینی ترمیم تے ستویں قومی مالیاتی کمیشن (این ایف سی) ایوارڈ دے بعد مالیاتی وفاقیت دے ارتقا، محصولات، اخراجات، وفاقی و صوبائی مالیاتی تعلقات، ادارہ جاتی ہم آہنگی تے عوامی وسائل دے استعمال متعلق اپݨے تجزیے تے مشاہدات دا ݙسایا ۔وفد اپݨی رپورٹ اچ مختلف پالیسی سفارشات وی پیش کیتیاں جنھاں دا مقصد مالیاتی نظم و ضبط، وسائل دے موثر استعمال، خدمات ݙیوݨ اچ بہتری تے وفاقی و صوبائی اداریں وچال موثر تعاون کوں ودھاوݨ اے۔وزیراعظم آکھیا جو عالمی بینک دی طرفوں پیش کیتا ڳیا تجزیہ تے بین الاقوامی تجربیں دی روشنی اچ تقابلی جائزہ لائقِ تحسین اے، ایہوجیھے مطالعے پالیسی سازی دے عمل اچ مفید رہنمائی ݙیوݨ اچ کلیدی اہمیت رکھیندن۔وزیراعظم رپورٹ دا تفصیلی جائزہ گھنݨ کیتے اعلیٰ سطحی کمیٹی بݨاوݨ دی ہدایت ݙتی۔ اے کمیٹی عالمی بینک دی رپورٹ اچ پیش کیتی ڳئی سفارشات دا متعلقہ فریقین بشمول صوبیں نال مشاورت تے پاکستان دے آئینی و وفاقی ڈھانچے کوں مدنظر رکھیندیں جائزہ گھنسی تاں جو عوامی مفاد اچ قابلِ عمل تجاویز تے غور کیتا ونڄ سڳے۔ملاقات اچ نائب وزیراعظم تے وزیرِ خارجہ محمد اسحاق ڈار، وفاقی وزرا احد خان چیمہ تے احسن اقبال، مشیرِ وزیراعظم ڈاکٹر سید توقیر شاہ، وزیرِ مملکت بلال اظہر کیانی تے اعلیٰ سرکاری حکام وی موجود ہن۔