وفاقی وزیرقومی غذائی تحفظ و تحقیق رانا تنویر حسین دی زیرِ صدارت اعلیٰ سطحی اجلاس، پاکستان تے ایف اے او دا پائیدار زراعت تے دیہی ترقی کیتے سانجھے اقدامات تے اتفاق

اسلام آباد۔31جولائی (اے پی پی) وفاقی وزیر قومی غذائی تحفظ و تحقیق رانا تنویر حسین دی زیرِ صدارت ہک اعلیٰ سطحی اجلاس منعقد تھیا جیں اچ خوراک و زراعت دی تنظیم (ایف اے او) دے ایشیا و بحرالکاہل کیتے ڈپٹی ریجنل نمائندہ رابرٹ سمپسن شرکت کیتی۔وزارتِ قومی غذائی تحفظ و تحقیق توں جاری اعلامیہ موجب اجلاس اچ جاری تعاون دا جائزہ ڳھدا ڳیا تے موسمیاتی تبدیلی نال ہم آہنگ زراعت، غذائی تحفظ تے پائیدار زرعی ترقی دے شعبیں اچ تعاون کوں مزید ودھارا ݙیوݨ دے امکانات تے ڳالھ مہاڑ کیتی ڳئی۔وفاقی وزیر ایف اے او دے وفد دا خیرمقدم کریندیں پاکستان دے نال تنظیم دی پراݨی شراکت داری دی تعریف کیتی تے زرعی شعبے تے غذائی نظام کوں مضبوط بݨاوݨ اچ ایف اے او دے تعاون کوں قابلِ قدر قرار ݙتا۔ انھاں آکھیا جو پاکستان عالمی کاربن اخراج اچ نہایت معمولی حصہ پاوݨ دے باوجود موسمیاتی تبدیلی توں ساریں توں زیادہ متاثر تھیوݨ آلے ملکاں اچ شامل اے، لہٰذا موسمیاتی لچک پیدا کرݨ تے جاری منصوبیں دی وقتی تکمیل کیتے ایف اے او دے مزید تکنیکی تعاون دی لوڑھ اے۔ایف اے او دے وفد وفاقی وزیر کوں جاری تعاون دے اہم شعبیں دا ݙسایا جنھاں اچ ون ہیلتھ پروگرام، غذائی تحفظ، سینیٹری و فائٹو سینیٹری (ایس پی ایس) نظام، اینٹی مائیکروبیل مزاحمت (اے ایم آر)، پائیدار زرعی میکانائزیشن، دریائے سندھ بسین پروگرام دے تحت موسمیاتی لچک تے جی آئی ایس، ریموٹ سینسنگ تے ایگرو میٹرولوجیکل ٹیکنالوجیز دے ذریعے موسمیاتی لحاظ توں موزوں زراعت دا ودھارا شامل ہن۔رابرٹ سمپسن وزارتِ قومی غذائی تحفظ و تحقیق دے اشتراک نال قومی موسمیاتی فورم دے انعقاد دی تجویز وی پیش کیتی جیں اچ حکومت، ترقیاتی شراکت داراں تے نجی شعبے کوں ہک پلیٹ فارم تے گھن تے آ تے زرعی شعبے اچ موسمیاتی چیلنجز نال نبڑݨ کیتے مشترکہ حکمتِ عملی بݨائی ونڄے۔ وفاقی وزیر ایں تجویز دا خیرمقدم کریندیں حکومت دے مکمل تعاون دا یقین ݙیوائے ۔وفاقی وزیر رانا تنویر حسین حکومت دیاں ترجیحات دا ݙسیندے آکھیا جو حکومت خوراک دے تحفظ تے ایس پی ایس نظام کوں مزید تکڑا بݨاوݨ، ناسڈرا دے ذریعے موسمیاتی تبدیلی نال ہم آہنگ تصدیق شدہ بِجاں دے ودھارے، زرعی میکانائزیشن تے ذخیرہ گاہواں دی توسیع، فارمر پروڈیوسرآرگنائزیشنز دے قیام، پسماندہ اضلاع اچ “ہک ضلع، ہک پیداوار” منصوبے دے نفاذ، مال ڈھور دی برآمدات اچ ودھارا تے کنڈپ کݨک تے کھاوݨ آلے تیل دی درآمدات تے انحصار گھٹاوݨ کیتے عملی اقدامات کریندی پئی اے۔ایف اے او دے وفد وفاقی وزیر کوں ݙسایا تنظیم دے براہِ راست مالی وسائل محدود ہن لیکن او پاکستان کیتے بین الاقوامی مالیاتی اداریں تے ترقیاتی شراکت داراں توں مالی وسائل دے گھنݨ اچ معاونت جاری رکھیسی۔اجلاس اچ پاکستان دی غذائی پیداوار، غذائیت دیاں ضرورتاں تے پالیسی خلا متعلق ایف اے او دی آندی پالیسی رپورٹ تے وی ڳالھ کیتی۔ ایں توں علاوہ ون کنٹری، ون پرائرٹی پروڈکٹ (OCOP) پروگرام دا وی جائزہ ڳھدا ڳیا جیں دے تحت پاکستان چلغوزے دے نال شریک اے جݙاں جو چونسہ امب کوں وی ایں پروگرام اچ شامل کرݨ دی تجویز زیرِ غور اے۔اجلاس دے اختتام تے ݙوہیں فریقاں موسمیاتی لچک، پائیدار زراعت، لائیو سٹاک دی ترقی تے غذائی تحفظ دے شعبیں اچ تعاون کوں مزید تکڑا بݨاوݨ دے عزم دا اعادہ کیتا اں جو پاکستان دے کساناں تے زرعی شعبے دی پائیدار ترقی کوں یقینی بݨایا ونڄ سڳے۔