وزیراعلیٰ سندھ مراد علی شاہ دی شاہ عبداللطیف بھٹائیؒ دے 283ویں عرس دی اختتامی تقریب اچ شرکت

حیدرآباد۔31 جولائی (اے پی پی) وزیراعلیٰ سندھ سید مراد علی شاہ حضرت شاہ عبداللطیف بھٹائیؒ دے 283ویں سالانہ عرس مبارک دی اختتامی تقریب اچ شرکت کیتی تے درگاہ تے حاضری ݙے تے عقیدت دا اظہار کیتا۔وزیراعلیٰ سندھ مزارِ حضرت شاہ عبداللطیف بھٹائیؒ تے پُھلاں دی چادر چاڑھی، فاتحہ خوانی کیتی تے ملک و قوم دی سلامتی، ترقی، خوشحالی، امن تے استحکام کیتے خصوصی دعا کیتی۔ انھاں حضرت شاہ حبیبؒ دے مزار تے وی حاضری ݙتی جݙاں جو درگاہ دے احاطے اچ شاہ جو راڳ دی روح پرور محفل اچ شرکت کیتی۔ ایں موقع تے انھاں وزیٹرز بک اچ اپݨے تاثرات وی درج کیتے تے مستحق تریمتاں اچ کپڑے تے تحفے ونڈئے۔ایں موقع تے صوبائی وزیر سید ناصر حسین شاہ، صوبائی وزیرِ ثقافت و سیاحت سید ذوالفقار علی شاہ، صوبائی وزیر محبوب الزمان، رکنِ سندھ اسمبلی قاسم سراج سومرو، کمشنر حیدرآباد فیاض حسین عباسی، ڈی آئی جی حیدرآباد طارق رزاق دھاریجو، ڈپٹی کمشنر مٹیاری دانش ذاکر، ایس ایس پی مٹیاری عبدالعلیم بلو تے ٻئے اعلیٰ حکام موجود ہن۔میڈیا نال ڳالھ کریندے وزیراعلیٰ سندھ سید مراد علی شاہ آکھیا جو حضرت شاہ عبداللطیف بھٹائیؒ دے عرس اچ شرکت انھاں کیتے باعثِ سعادت اے۔ انھاں آکھیا جو سندھ صوفیاں تے اولیائے کرام دی دھرتی اے جتھوں ہمیشہ محبت، امن، رواداری، اخوت تے انسانیت دا پیغام ملدے۔ انھاں آکھیا جو شاہ عبداللطیف بھٹائیؒ اپݨی شاعری دے ذریعے امن، بھرپی تے اعلیٰ انسانی اقدار کوں ودھارا ݙتا، انھاں دا پیغام اڄ وی پوری انسانیت کیتے مشعلِ راہ اے۔کشمیر دے معاملے تے ڳالھ کریندے وزیراعلیٰ سندھ آکھیا جو پاکستان پیپلز پارٹی دے چیئرمین بلاول بھٹو زرداری کشمیری عوام دے حقوق کیتے موثر آواز بلند کریندے پئن۔ انھاں آکھیا جو پیپلز پارٹی ہمیشہ مسئلہِ کشمیر تے کشمیری عوام دے موقف دی حمایت کیتی تے ہر قومی و عالمی فورم تے انھاں دا مقدمہ پیش کیتا۔آزاد جموں و کشمیر دے انتخابی عمل متعلق سوال تے وزیراعلیٰ سندھ آکھیا جو انتخابات شفاف، آزادانہ تے منصفانہ تھیوݨے چاہیدن تاں جو عوام بلا خوف و خطر اپݨے حقِ رائے دہی دا استعمال کرسڳن۔نویں صوبیں دے قیام متعلق سوال تے انھاں آکھیا جو سندھ صوفیاں دی دھرتی اے تے اتھاں دے عوام اپݨے صوبے دے مفادات دے تحفظ کیتے متحد ہن، ایہوجہیاں تجویزاں کوں قبول نئیں کیتا ونڄ سڳدا۔نوجواناں دے حوالے نال وزیراعلیٰ سندھ آکھیا جو نوجوان ملک دا مستقبل تے قیمتی سرمایہ ہن، حکومت انھاں دی تعلیم، تربیت تے ترقی کیتے اقدامات کریندی پئی اے، نوجواناں دے بارے اچ غیر مناسب زبان دا استعمال درست نی۔سرکاری ملازمین متعلق سوال تے سید مراد علی شاہ آکھیا جو پیپلز پارٹی کݙاہیں نئیں چاہندی جو کہیں ملازم کوں ملازمت توں کڈھیا ونڄے ،حکومت ملازمین دے حقوق دے تحفظ تے یقین رکھیندی اے تاں جو سارے فیصلے قانون تے ضابطیں موجب کیتے ویندن۔بعد اچ وزیراعلیٰ سندھ بھٹ شاہ دے ایچ ٹی سورلی ہال اچ محکمہِ ثقافت، سیاحت، آثارِ قدیمہ و آرکائیوز سندھ دے زیرِ اہتمام منعقدہ لطیف ایوارڈز تقریب اچ شرکت کیتی، جتھاں شاہ عبداللطیف بھٹائیؒ دے فکر و فلسفے، ادب، تحقیق، موسیقی تے ثقافتی ورثے دے ودھارے کیتے خدمات انجام ݙیوݨ آلی شخصیات کوں ایوارڈز نال نوازیا ڳیا۔تقریب دا آغاز تلاوتِ کلامِ پاک توں تھیا، جیں دے بعد شاہ لطیف دی شاعری تے مبنی صوفیانہ تے لوک موسیقی پیش کیتی ڳئی۔ معروف کمپیئر زاہد قاضی نظامت دے فرائض انجام ݙتے جݙاں جوممتاز فنکار ممتاز لاشاری تے معروف گلوکار شمن علی میرالی اپݨی پرفارمنس نال شرکا کوں محظوظ کیتا۔اختتامی خطاب اچ وزیراعلیٰ سندھ سید مراد علی شاہ آکھیا جو حضرت شاہ عبداللطیف بھٹائیؒ دا پیغام محبت، امن، رواداری، انسانیت تے بھرپی دا پیغام اے، جیڑھا اڄ وی پوری دنیا کیتے رہنمائی دا ذریعہ اے۔ انھاں آکھیا جو سندھ حکومت شاہ لطیف دے فکر و فلسفے، ادب، موسیقی تے ثقافتی ورثے دے تحفظ تے ودھارے کیتے اپݨی کوششاں جاری رکھیسی۔تقریب اچ صوبائی وزرا، منتخب نمائندیں، اعلیٰ سرکاری افسراں، ادیباں، شاعراں، دانشوراں، فنکاراں، راڳیاں تے مختلف شعبہ ہائے زندگی نال تعلق رکھݨ آلی شخصیات سودھے زائرین دی ٻہوں وݙی تعداد شرکت کیتی۔