چیئرمین نیشنل ڈیزاسٹر مینجمنٹ اتھارٹی دا پنجاب ہیڈ آفس دا دورہ

لاہور۔ 3 اگست (اے پی پی) چیئرمین نیشنل ڈیزاسٹر مینجمنٹ اتھارٹی جنرل (ریٹائرڈ) انعام حیدر ملک پنجاب ڈیزاسٹر مینجمنٹ اتھارٹی ہیڈ آفس دا دورہ کیتا۔ صوبائی وزیر تے چیئرمین کابینہ کمیٹی ڈیزاسٹر مینجمنٹ خواجہ سلمان رفیق تے ڈی جی پی ڈی ایم اے سیف انور جپہ چیئرمین این ڈی ایم اے کوں خوش آمدید آکھیا۔ترجمان موجب ایں موقع تے صوبائی ایمرجنسی کنٹرول سنٹر دا دورہ وی کیتا ڳیا تے اہم اجلاس وی منعقد تھیا جیں اچ پنجاب اچ ساوݨ تے چھل دے حوالے نال حالات توں بچݨ دے اقدامات دا تفصیلی جائزہ ڳھدا ڳیا۔ ایں موقع تے چیئرمین این ڈی ایم اے دی ٹیکنیکل ٹیم تے ٻئے افسر وی موجود ہن۔اجلاس دے دوران کلائمیٹ چینج، کیپیسٹی بلڈنگ، ریسورس مینجمنٹ تے ٻئی اہم امور تے ڳالھ مہاڑ کیتی ڳئی ۔ صوبائی وزیرِ صحت اجلاس اچ ڳالھ کریندے آکھیا جو پنجاب کوں چھل توں محفوظ بݨاوݨ کیتے سارے اقدامات کیتے ویندے پئن، محکمہِ صحت، ریسکیو، لائیو سٹاک تے ٻئے محکمے فیلڈ اچ پوری طرح متحرک ہن تے انتظامیہ ہنگامی حالات نال نبڑݨ کیتے پوری طرح تیار اے۔خواجہ سلمان رفیق آکھیا جو ریسکیو کوں ارباں روپے دی لاگت دے جدید آلات نال آراستہ کر ݙتا ڳئے جݙاں جو پنجاب دے مختلف شہراں اچ کروڑاں روپے دی لاگت نال نویں ویئر ہاؤسز قائم کیتے ویندے پئن، گزریل سال دی نسبت پی ڈی ایم اے دیاں اڄوکے سال تیاریاں ٻہوں بہتر ہن۔ایں موقع تے چیئرمین این ڈی ایم اے اظہارِ خیال کریندیں آکھیا جو وزیراعظم محمد شہباز شریف دے ویژن موجب این ڈی ایم اے سارے صوبیں نال چھل دے حوالے نال مکمل کوآرڈینیشن اچ اے، ہنگامی صورتحال نال نبڑݨ کیتے پی ڈی ایم اے، ریسکیو تے ٻئے متعلقہ اداریں دا ٻہوں عمدہ رسپانس اے۔ جنرل (ریٹائرڈ) انعام حیدر ملک مزید آکھیا جو سٹرکچرل کولیپس تے ٻئے ضیان کوں بچݨ کیتے این ڈی ایم اے پیشگی انتظامات کر رکھئن۔ڈی جی پی ڈی ایم اے بریفنگ ݙیندیں آکھیا جو موجودہ حالات اچ سارے افسران فیلڈ اچ الرٹ ہن، ساوݨ سیزن تے دریاواں اچ پاݨی دے وہݨ کوں مسلسل مانیٹر کیتا ویندا پئے تے اربن فلڈنگ نال نبڑݨ کیتے زیرِ زمین واٹر سٹوریج ٹینکس بݨائے ویندے پئن۔ انھاں آکھیا جو واسا دا دائرہ کار 2 شہراں توں ودھا تے 41 شہراں تئیں کر ݙتا ڳئے۔ ایں موقع تے جنرل انعام حیدر ملک صوبائی وزیر خواجہ سلمان رفیق تے سیف انور جپہ کوں یادگار شیلڈز وی پیش کیتیاں۔