وزارتِ تجارت 4 اگست کوں 10ویں پاکستان-ایران مشترکہ تجارتی کمیٹی دے اجلاس دی میزبانی کریسی

اسلام آباد۔ 3 اگست (اے پی پی) وزارتِ تجارت 4 اگست 2026ء کوں اسلام آباد اچ 10ویں پاکستان-ایران مشترکہ تجارتی کمیٹی (جے ٹی سی) دے اجلاس دی میزبانی کریسی۔ترجمان وزارتِ تجارت موجب اجلاس دی مشترکہ صدارت وفاقی وزیرِ تجارت جام کمال خان تے ایران دے وزیرِ صنعت، کان کنی و تجارت محمد اتابک کریسن۔ تجارت دے سپیشل سیکریٹری سید حمید علی تے ݙوہیں ملکاں دے اعلیٰ حکام وی اجلاس اچ شرکت کریسن۔ایران دے 22 رکنی اعلیٰ سطحی سرکاری وفد دے نال ایران چیمبر آف کامرس، انڈسٹریز، مائنز اینڈ ایگریکلچر (آئی سی سی آئی ایم اے) دی قیادت اچ 16 رکنی کاروباری وفد وی اجلاس اچ شریک تھیسی۔مشترکہ تجارتی کمیٹی ݙو طرفہ تجارتی اقدامات تے تھیوݨ آلی پیش رفت دا جائزہ گھنسی تے پاکستان-ایران آزاد تجارتی معاہدے (ایف ٹی اے) کوں اڳوں ودھاوݨ، سرحد پار تجارت کوں سہولت ݙیوݨ، کسٹمز تے بینکاری تعاون کوں تکڑا بݨاوݨ، نقل و حمل تے ٹرانزٹ رابطیں کوں بہتر بݨاوݨ تے سرمایہ کاری و تجارتی تعاون کوں وسعت ݙیوݨ دے اقدامات تے ڳالھ مہاڑ کریسی۔