پاکستان دا نظام ناکام کائنی، قومی اصلاحات دے دور اچ داخل تھی چکئے، “اُڑان پاکستان” دا قومی سفر کہیں ہک جماعت یا حکومت دا نی بلکہ پوری قوم دی اجتماعی کوشش اے، وفاقی وزیر احسن اقبال

اسلام آباد۔ 3 اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیا جو اڄ پاکستان ہک نویں سویل دی دہلیز تے کھڑے، ایہوجیھی سویل جیڑآھی امید، عزم، قومی یکجہتی تے ترقی دے روشن امکانات دی نوید گھن تے طلوع تھیندی پئی اے۔یومِ آزادی دی 79ویں سالگنڈھ تے بانیِ پاکستان قائداعظم محمد علی جناحؒ دے 150ویں یومِ پیدائش دی مناسبت نال قومی نغمے دی افتتاحی تقریب نال خطاب کریندیں انھاں آکھیا جو اڄ دی تقریب محض ہک قومی نغمے دی رونمائی نی بلکہ ہک ایہوجیھی قومی تحریک دا آغاز اے جیں دا مقصد قوم دی اجتماعی روح، فکری سمت تے ترقی دے عزم کوں نویں سروں بیدار کرݨ اے۔وفاقی وزیر آکھیا جو پاکستان دیاں فکری بنیاداں شاعرِ مشرق، حکیم الامت علامہ محمد اقبالؒ تے بانیِ پاکستان قائداعظم محمد علی جناحؒ دے افکار توں استوار ہن، علامہ اقبالؒ قوم کوں خودی، خود اعتمادی، علم، کردار تے عمل دا درس ݙتا جݙاں جو قائداعظمؒ ایں فکر کوں عملی تعبیر ݙے تے ہک آزاد، خودمختار، جدید تے ترقی پسند ریاست دی بنیاد رکھی۔ انھاں آکھیا جو سال 2026 قائداعظمؒ دی ڈڈھ سوویں سالگنڈھ دا سال اے، جیڑھا اساکوں اپݨے بانیانِ وطن دے خواباں دی تکمیل دے عہد دی تجدید دا موقع ݙیندے۔وفاقی وزیر آکھیا جو اساݙی نوجوان نسل روشن امید دا چراغ ہن، اساݙے نوجوان کاکروچ نی بلکہ اقبال دے شاہین ہن۔ وفاقی وزیر آکھیا جو کجھ حلقیں 2022 اچ پاکستان دے معاشی دیوالیہ تھیوݨ تے نظام دے ٻہہ ونڄݨ دیاں پیشگوئیاں کیتیاں ہن مگر قوم دے اجتماعی عزم، حکومتی اقدامات تے عوامی تعاون نال پاکستان نہ صرف انھاں اوکھ تے قابو پاتا بلکہ ول ترقی دی راہ اختیار کیتی۔ انھاں آکھیا جو اڄ ٻاہرلے ملک رہݨ آلے پاکستانی وی وطن دی معاشی بحالی تے مثبت پیشرفت دا اعتراف کریندے پئن جیڑھے پوری قوم دی مشترکہ کوششاں دا نتیجہ اے۔انھاں آکھیا جو “اُڑان پاکستان” قومی معاشی تبدیلی دا ایہوجیھا جامع فریم ورک اے جیں دا مقصد پاکستان کوں اکویویں صدی دی معیشت نال ہم آہنگ کرݨ، ہک ٹریلین ڈالر معیشت دی بنیاد رکھݨ، برآمدات اچ نمایاں ودھارا، جدید ٹیکنالوجی دا ودھارا ، توانائی دے شعبے اچ خود انحصاری، ڈیجیٹل معیشت دی تشکیل، انسانی وسائل دی مہارتاں اچ ودھارا، معیاری تعلیم و صحت، آبادی دے مؤثر انتظام تے پائیدار ترقی دے اہداف دا حصول اے۔ انھاں آکھیا جو حکومت نوجواناں کوں جدید ٹیکنالوجی، مصنوعی ذہانت، ڈیجیٹل مہارتاں تے مستقبل دے تقاضیں نال ہم آہنگ تعلیم ݙیوݨ کیتے مختلف پروگراماں تے تربیتی منصوبیں تے بھرپور سرمایہ کاری کریندی پئی اے کیوں جو نوجوان صرف پاکستان دا مستقبل ہی نی بلکہ ایں دا حال وی ہن۔انھاں آکھیا جو علامہ اقبالؒ اساکوں صرف خواب ݙیکھݨ دا درس نی ݙتا بلکہ اے وی سکھائے جو خواباں کوں علم، کردار، محنت تے مسلسل جدوجہد نال حقیقت اچ کینویں بدلیا ویندے۔ انھاں نوجواناں تے زور ݙتا جو وہ اپݨی صلاحیتاں تے یقین رکھن، محدود سوچ توں اُچے تھیون، اپݨی خودی کوں تکڑا بݨاون تے قومی ترقی اچ فعال کردار ادا کرن۔وفاقی وزیر آکھیا جو پاکستان دی اصل طاقت ایں دی ماضی دی اوکھ اچ نی بلکہ ایں دے نوجواناں دے عزم، صلاحیت، علم تے بلند حوصلے اچ مضمر اے۔ انھاں آکھیا جو ترقی، خوشحالی تے قومی سلامتی دا سفر اوں ویلھے ممکن اے ڄݙاں پوری قوم اجتماعی شعور، قومی یکجہتی تے اصلاحات دے ایجنڈے کوں اپݨا مشترکہ مشن بݨاوے۔ انھاں ایں عزم دا اظہار کیتا جو “اُڑان پاکستان” دا قومی سفر کہیں ہک جماعت یا حکومت دا نی بلکہ پوری قوم دی اجتماعی کوشش اے جیڑھا پاکستان کوں ہک مضبوط، خود انحصار، خوشحال تے باوقار ریاست بݨاوݨ دے پاسے گھن ویسے۔