لاہور سودھے مختلف ضلعیں اچ مینھ وسݨ دا الرٹ جاری، ہنگامی صورتحال نال نبڑݨ کیتے متعلقہ محکمے الرٹ رہن، ڈی جی پی ڈی ایم اے

لاہور۔ 3 اگست (اے پی پی) پی ڈی ایم اے صوبائی دارالحکومت لاہور، راولپنڈی سودھے پنجاب دے مختلف ضلعیں اچ مینھ وسݨ دا الرٹ جاری کرݙتے ۔ڈائریکٹر جنرل پی ڈی ایم اے سیف انور جپہ صوبے دے ڈپٹی کمشنرز کوں الرٹ رہݨ دی ہدایت کریندیں آکھیا جو وزیراعلیٰ پنجاب مریم نواز شریف خود ساری صورتحال کوں مانیٹر کریندیاں پئن۔ ہنگامی صورتحال نال نبڑݨ کیتے سارے متعلقہ محکمے الرٹ رہن۔ڈی جی پی ڈی ایم اے آکھیا جو صوبائی کنٹرول روم سودھے سارے اضلاع دے ڈسٹرکٹ ایمرجنسی آپریشن سنٹرز کوں وی الرٹ رکھن۔ پی ڈی ایم اے کنٹرول روم اچ صورتحال دی مانیٹرنگ مسلسل جاری اے، لہٰذا 1122 تے واسا سودھے ٻئے ریسکیو ادارے مشینری سودھے عملے کوں الرٹ رکھن تے نشیبی علاقیں توں پاݨی دی نکاسی کوں وقتی ممکن بݨاون۔انھاں آکھیا جو چوکنگ پوائنٹس تے جمع پاݨی دی نکاسی کوں یقینی بݨایا ونڄے کیوں مینھ دا اے سلسلہ 5 اگست تئیں جاری رہݨ دی پیشگوئی اے۔انھاں آکھیا جو خراب موسم دے دوران شہری احتیاط کرن، بجلی دے کھمبیں تے لٹکدیاں تاراں توں پَرے رہن۔ شہری کچے مکاناں تے بوسیدہ عمارتاں توں ھک پاسے رہن۔ ٻالاں دا خاص خیال رکھن، انھاں کوں نشیبی علاقیں اچ جمع پاݨی دے نیڑے اصلوں نہ ونجݨ ݙیون۔انھاں مزید آکھیا جو کہیں وی ہنگامی صورتحال اچ شہری مدد کیتے پی ڈی ایم اے دی ہیلپ لائن 1129 تے کال کرن۔