وزیراعظم دی اڳواݨی اچ سرکاری اداریاں دی نجکاری بارے جائزہ اجلاس

اسلام آباد۔ 3 اگست(اے پی پی)وزیراعظم محمد شہباز شریف نجکاری پروگرام دے سارے مراحل مقررہ مُد اچ مکمل کرݨ دی ہدایت کریندے آکھیے جو نجکاری دے مختلف مراحل دی ویلھے سر تکمیل کیتے متعلقہ وزارتاں اتے ادارے باہمی رل مل تے کم کرن۔ انہاں اے ہدایات اسلام آباد اچ اپݨی اڳواݨی اچ تھیوݨ آلے ہک اجلاس اچ آکھی جیندے اچ سرکاری اداریاں دی نجکاری اچ اڳونہا دا جائزہ ڳھدا ڳیا۔ وزیرِ اعظم نجکاری پروگرام دے تحت طے شدہ اہداف اتے ٹائم لائنز تے عملدرآمد یقینی ٻݨاوݨ دی ہدایت کیتی اتے آکھیا جو زرعی ترقیاتی بینک دی نجکاری دا طریقہ کار اینڄھا ٻݨایا ونڄے جو بینک دا بنیادی مقصد اتے زرعی شعبے اچ ایںدا کردار برقرار رہوے، نجکاری دے بعد وی چھوٹے اتے درمیانے درجے دے کساناں کوں زرعی قرضیاں اتے مالی وسائل ݙیوݨ تے زرعی ترقیاتی بینک دی توجہ وی برقرار رہوے۔ وزیراعظم آکھیا جو کساناں، بالخصوص چھوٹے اتے درمیانے درجے دے کاشتکاراں دی فی ایکڑ پیداوار ودھاوݨ کیتے مالی وسائل تئیں رسائی یقینی ٻݨاوݨ ضروری اے، زرعی ترقی پاکستان دی معاشی ترقی اتے غذائی تحفظ کیتے بنیادی اہمیت رکھیندی اے۔ اجلاس اچ وزارتِ نجکاری نجکاری پروگرام، مختلف سرکاری اداریاں دی نجکاری کیتے ہݨ تئیں دی اڳونہی اتے آئندہ دے اہداف تے تفصیلی بریفنگ ݙتی جو ہݨ تئیں 27 سرکاری ادارے ترائے مختلف مراحل اچ نجکاری دے ایجنڈے اچ شامل ہین، پاکستان انٹرنیشنل ایئرلائنز (PIA) اتے فرسٹ ویمن بینک دی نجکاری بارے فنانشل کلوزنگ دا مرحلہ مکمل تھی چکیے۔ وزیراعظم کوں اسلام آباد الیکٹرک سپلائی کمپنی، فیصل آباد الیکٹرک سپلائی کمپنی اتے گوجرانوالہ الیکٹرک پاور کمپنی دی نجکاری تے وی بریفنگ ݙتی ڳئی جو انھاں تقسیم کار کمپنیاں کیتے بین الاقوامی کمپنیاں دلچسپی ݙکھائی اے، ایں سانڳے سرمایہ کاراں دے نال روڈ شوز دا عمل وی جاری اے۔ وزیراعظم کوں زرعی ترقیاتی بینک لمیٹڈ دی نجکاری دا وی ݙسایا ڳیا۔ اجلاس اچ نائب وزیراعظم و وزیرِ خارجہ سینیٹر محمد اسحاق ڈار، وفاقی وزراء خواجہ محمد آصف، جام کمال خان، احد خان چیمہ، سردار اویس خان لغاری، وزیرِ مملکت بلال اظہر کیانی، معاونِ خصوصی ہارون اختر اتے متعلقہ اعلیٰ حکام شرکت کیتی۔