پاکستان تے ایران وچال ݙو پاسہ تجارت دا حجم 10 ارب ڈالر تئیں ودھیسوں، جام کمال خان

اسلام آباد۔ 4 اگست (اے پی پی) وفاقی وزیر برائے تجارت جام کمال خان آکھیا جو پاکستان تے ایران وچال ݙو پاسہ تجارت دا حجم 10 ارب ڈالر تئیں ودھیسوں، ݙوہائیں ملکاں دے تاریخی برادرانہ تعلقات کوں مضبوط معاشی شراکت داری اچ تبدیل کرݨ وقت دی ضرورت اے۔ اے ڳالھیں انہاں منگل کوں مقامی ہوٹل اچ ایرانی وزیرِ صنعت تے تجارت ڈاکٹر محمد اتابک دے نال 10 ویں پاکستان ایران جوائنٹ ٹریڈ کمیشن دے اجلاس دی مشترکہ صدارت کریندیں ہوئیں کیتا۔ فورم نال خطاب اچ جام کمال خان آکھیا جو پاک ایران فری ٹریڈ ایگریمنٹ کوں جلد حتمی شکل ݙتی ویسے اتے ݙوہائیں ملکاں وچال بارٹر ٹریڈ اچ وی اضافہ کیتا ویسے۔ انھاں آکھیا جو سرحدی لاجسٹکس، کسٹمز تے کارگو نقل و حرکت اچ حائل رکاوٹاں دا خاتمہ ضروری اے، مشترکہ سرحدی منڈیاں دے قیام تے الیکٹرانک ڈیٹا انٹرچینج نال ݙوپاسہ تجارت اچ نمایاں ودھارا تھیسی۔ فورم نال خطاب اچ ایران دے وزیرِ تجارت محمد اتابک آکھیا جو تجارت کیتے مشترکہ رستیاں دی لوڑھ اے، اساں آپݨے ہمسائیاں دے نال چنڳے تعلقات بالخصوص پاکستان دے نال ݙوطرفہ تجارتی تعلقات کوں مثبت انداز نال اڳاں ودھاوݨ چاہندوں۔ انھاں آکھیا جو ݙوپاسہ تجارت کوں نویاں بلندیاں تئیں گھن ونڄݨ کیتے پرعزم ہن، تجارت تے معیشت دی بہتری کیتے ہک ٻئے دے تجربات توں استفادہ کریسوں۔ محمد اتابک آکھیا جو اساں تجارت دے نویں دور اچ داخل تھیندے پئیوں، پاکستان دے نال طویل سٹریٹجک پارٹنرشپ چاہندوں، ݙوہائیں ملکاں دی دوستی کوں پائیدار معاشی شراکت داری اچ بدلݨ اے۔ ڈاکٹر محمد اتابک کراچی تے گوادر بندرگاہواں دے ذریعے علاقائی تجارت تے لاجسٹک تعاون ودھاوݨ دی خواہش دا وی اظہار کیتا۔ ایرانی وزیر پاک ایران فری ٹریڈ ایگریمنٹ جلد مکمل تھیوݨ دی امید ظاہر کیتی۔ ڈاکٹر محمد اتابک بجلی دی تجارت تے علاقائی رابطیاں کوں ݙوہائیں ملکاں کیتے نویں معاشی مواقع قرار ݙتا۔