حکومت جامع قومی بیٹری انرجی سٹوریج فریم ورک تے کم کریندی پئی اے جئیں اچ حفاظتی معیارات، گرڈ کنکشن، تکنیکی تقاضیاں اتے سرمایہ کاراں کیتے واضح قواعد و ضوابط شامل ہوسن، سردار اویس احمد خان لغاری

اسلام آباد۔ 4 اگست (اے پی پی) وفاقی وزیر برائے توانائی سردار اویس احمد خان لغاری آکھیا جو پاکستان توانائی دے شعبے اچ تاریخی تبدیلی توں گزردا پئے، گزشتہ مالی سال دے اختتام تک آزادانہ تخمینیاں دے مطابق ملک اچ ڈسٹری بیوٹڈ سولر دی استعداد تقریباً 38 گیگاواٹ تئیں پڄ ڳئی اے جو یوٹیلیٹی سطح دی مجموعی پیداواری استعداد دے قریب اے، حکومت ہک جامع قومی بیٹری انرجی سٹوریج فریم ورک تے وی کام کریندی پئی اے جئیں اچ حفاظتی معیارات، گرڈ کنکشن، تکنیکی تقاضیاں تے سرمایہ کاراں کیتے واضح قواعد و ضوابط شامل ہوسن۔ منگل کوں سولر، سٹوریج تے فلیکسیبلٹی کانفرنس 2026ء نال خطاب کریندیں ہوئیں وفاقی وزیر آکھیا جو سولر، سٹوریج تے فلیکسیبلٹی محض ترائے اصطلاحواں نئی بلکہ اج پاکستان دے بجلی دے شعبے کوں درپیش سب توں وݙے تکنیکی تے پالیسی چیلنج دی عکاسی کریندن، قومی گرڈ یک طرفہ بجلی دی ترسیل دے تصور دے تحت تشکیل ݙتا ڳیا ہئی جڈانجو اڄ او لکھاں گھراں تے کاروباری مراکز دی چھتاں تے نصب سولر سسٹمز توں بجلی وصول کریندا پئے جئیں دے نتیجے اچ ݙینہہ دے اوقات اچ بجلی دی طلب گھٹ تھیندی پئی اے جڈانجو شام دے ویلھے اچ طلب بدستور بلند رہندی اے۔ دنیا دے کئی ملکاں جئیں صورتحال یعنی “ڈک کَرو” نال نبڑݨ کیتے ہک دہائی تک تیاری کیتی، پاکستان اج ایں مرحلے دا سامݨا غیر معمولی رفتار نال کریندا پئے، اے کامیابی کہیں حکومتی سبسڈی یا طویل المدتی منصوبہ بندی دا نتیجہ نئی بلکہ لکھاں پاکستانی شہریاں، کساناں، صنعتکاراں، تاجراں تے گھریلو صارفین دے انفرادی فیصلیاں دا ثمر اے جئیں گھٹ لاگت تے قابلِ اعتماد توانائی حاصل کرݨ کیتے سولر ٹیکنالوجی کوں اپنایا۔وفاقی وزیر آکھیا جو مقامی ذرائع توں پیدا تھیوݨ آلی بجلی دا ہر یونٹ پاکستان دی توانائی خودمختاری کوں مضبوط کریندے، سورج تے ہوا توں حاصل تھئیوݨ آلی توانائی او اثاثے ہن جئیں کوں نہ کوئی عالمی تنازعہ متاثر کر سڳدے اتے نہ کہیں بیرونی منڈی دا اتارا چڑھاؤ۔ تاہم بیٹری انرجی سٹوریج انھاں ذرائع کوں حقیقی معنیاں اچ قابلِ اعتماد بݨیندے تانجو بجلی صرف سورج دی روشنی اچ نئی بلکہ اوں ویلھے وی دستیاب ہووے جݙݨ عوام کوں ایں دی لوڑھ ہووے۔انھاں آکھیا جو اساݙا مقصد صرف درآمدی بیٹریاں تے انحصار کرݨ نئی بلکہ پاکستان اچ بیٹری پیک، انکلوژرز، سسٹم انٹیگریشن، انجینئرنگ، سافٹ ویئر اتے متعلقہ ٹیکنالوجیز دی مقامی صنعت کوں فروغ ݙیوݨ اے تانجو ایں تبدیلی دی معاشی قدر وی ملک دے اندر ای پیدا تھیوے۔، ایں مقصد دے تحت وزارتِ صنعت و پیداوار بیٹری انرجی سٹوریج سسٹمز دی مقامی مینوفیکچرنگ پالیسی کوں حتمی شکل ݙیندی پئی اے جئیں دے ذریعے مقامی سرمایہ کاری تے پیداواری صلاحیت دی حوصلہ افزائی کیتی ویسے۔