سکیورٹی فورسز دی خیبرپختونخوا اچ عزمِ استحکام وژن دے تحت مؤثر انٹیلی جنس بیسڈ کارروائیاں، کئی خوارج جہنم واصل

اسلام آباد۔ 4 اگست (اے پی پی) سکیورٹی فورسز دی خیبرپختونخوا اچ عزمِ استحکام وژن دے تحت مؤثر انٹیلی جنس بیسڈ کارروائیاں جاری ہن، فورسز لکی مروت اچ کئی خوارج کوں جہنم واصل کیتے۔ سکیورٹی ذرائع دے مطابق لکی مروت اچ انٹیلی جنس بیسڈ کارروائیاں دے دوران سکیورٹی فورسز خوارج دے کئی ٹکاݨے تباہ کیتے۔ لکی مروت اچ کیتی ڳئی انھاں کارروائیاں دے دوران کئی خوارج کوں جہنم واصل کیتا ڳیا، ہلاک خوارج دہشت گرداں توں بھاری مقدار اچ اسلحہ، گولہ بارود تے ٻیا سامان وی برآمد تھیا۔ سکیورٹی ذرائع دے مطابق آپریشن دے دوران سکیورٹی فورسز دے ہتھوں فتنہ الخوارج دے متعدد دہشت گرداں دے زخمی تھیوݨ دی وی اطلاعات ہن۔ سکیورٹی ذرائع آکھیا جو کارروائیاں اچ ایں ڳالھ کوں یقینی بݨایا ویندا پئے جو عوام دے جان و مال دا تحفظ رہوے اتے مقامی آبادی کوں کوئی نقصان نہ تھیوے۔ سکیورٹی فورسز خیبرپختونخوا اچ پائیدار امن دے قیام تے دہشت گردی دے مکمل خاتمے تئیں کارروائیاں جاری ہن۔