نائب وزیراعظم محمد اسحاق ڈار دا براڈ پیک دے المناک حادثے اچ ݙاہ کوہ پیماواں دے جانی نقصان تے افسوس

اسلام آباد۔ 4 اگست (اے پی پی) نائب وزیراعظم تے وزیرِ خارجہ سینیٹر محمد اسحاق ڈار گلگت بلتستان اچ براڈ پیک سر کرݨ دی مہم دے دوران برفانی تودہ ݙہݨ دے المناک حادثے اچ معروف کوہ پیما نرمل پورجا سمیت ݙاہ کوہ پیماواں دے جانی نقصان تے ݙکھ تے افسوس دا اظہار کیتا۔ منگل کوں سماجی رابطے دے پلیٹ فارم ایکس تے جاری بیان اچ نائب وزیراعظم سینیٹر محمد اسحاق ڈار سوگوار خانداناں دے اہل خانہ دے نال نال چین، نیپال، عمان، برطانیہ تے امریکہ دی حکومتاں تے عوام توں وی دلی تعزیت دا اظہار کیتا۔ نائب وزیراعظم آکھیا جو اساں آپݨے بہادر پاکستانی کوہ پیما ہنزہ دے سہیل ساقی دے انتقال تے وی سوگوار ہیسے جئیں دی جرأت، عزم تے بلند پہاڑاں نال غیر معمولی محبت کوں ہمیشہ فخر دے نال یاد رکھیا ویسے۔ انھاں آکھیا جو مرݨ آلے تمام کوہ پیماواں آپݨے عزم، ہمت تے اعلیٰ کارکردگی حاصل کرݨ دی لگن نال کوہ پیمائی دے حقیقی جذبے دی عکاسی کیتی جو آوݨ آلی نسلاں کیتے ہمیشہ باعثِ تحریک رہسی۔ نائب وزیراعظم سینیٹر محمد اسحاق ڈار آکھیا جو میں آپݨے ریسکیو عملے دی انتھک کوششاں کوں خراجِ تحسین پیش کرینداں جئیں انتہائی دشوار گزار تے بلند پہاڑی علاقیاں دے کٹھن حالات اچ پیشہ ورانہ مہارت تے غیر معمولی ذمہ داری دا مظاہرہ کیا۔ انھاں آکھیا جو پاکستان متعلقہ ملکاں دے سفارت خانیاں دے نال قریبی رابطے تے تعاون دے ذریعے جاری تلاش تے ریسکیو کارروائیاں کیتے آپݨے عزم دا اعادہ کریندے۔ انھاں لقمہِ اجل بݨݨ آلیاں دے پسماندگان نال ہمدردی دا اظہار کیتا۔